މިދިޔަ އަހަރުގެ ޖޫން މަހު، ސިވިލް ކޯޓަށް ހުށަހެޅުނު މި މައްސަލައަކީ، ޕަބްލިކް ސާވިސް މީޑިއާއިން މީޑިއާނެޓާއެކު ވެފައިވާ އެއްބަސްވުންތަކުގެ ދަށުން، މީޑިއާނެޓުން ހޯދާފައިވާ ހިދުމަތްތަކުގެ އަގާއި އަދި އެ އަގުތައް ދައްކާފައި ނުވުމުން އަރާފައިވާ ޖޫރިމަނާ ފައިސާއެވެ.
މީޑިއާނެޓުން ޝަރީއަތުގައި އެދިފައިވާނީ މި ފައިސާ އެކީ އެއް ފަހަރާ އެ ކުންފުންޏަށް ޕީއެސްއެމުން ނަގައިދިނުމަށެވެ. މި މައްސަލައިގެ ޝަރީއަތުގައި ޕީއެސްއެމުންވަނީ މީޑިއާނެޓުން ހޯދި ހިދުމަތުގެ އަގަކީ އެ ކުންފުނިން ދައްކަން ޖެހޭ ފައިސާއެއް ކަމަށް އެއްބަސްވެފައެވެ. އެހެންނަމަވަވެސް ޖޫރިމަނާގެ ފައިސާއާ މެދު ޕީއެސްއެމުން އިންކާރުކުރިއެވެ. މީޑިއާނެޓުން ހޯދާފައިވާ ހިދުމަތްތަކުގެ އަގަކީ 5 މިލިއަން ރުފިޔާއެވެ. އަދި އަނެއް 4 މިލިއަން ރުފިޔާއަކީ ފައިސާ ނުދެއްކުމުން އަރާފައިވާ ޖޫރިމަނާއެވެ.
މީޑިއާނެޓުން ހޯދި ހިދުމަތްތަކަށް ޕީއެސްއެމުން ފައިސާ ދައްކާފައިނުވާތީ ކޯޓަށް ދިޔުމުގެ ކުރިން މީޑިއާނެޓުންވަނީ އިންސްޓޯލްމެންޓް ޕްލޭނެއްގެ ދަށުން ފައިސާ ދެއްކުމަށްވެސް ޕީއެސްއެމަށް ފުރުސަތު ދީފައެވެ. އެހެންނަމަވެސް ޕީއެސްއެމުން ފައިސާ ދައްކާފައެއް ނުވެއެވެ.
މި މައްސަލައިގައި މިއަދު ސިވިލް ކޯޓުގެ ގާޒީ އަބްދުއްނާސިރު ޝަފީގު ކުރި ހުކުމުގައި ބުނެފައިވަނީ މީޑިއާނެޓުން ދައުވާ ކުރާ 9،309،577.52 ރުފިޔާ މިއަދުން ފެށިގެން އެއް މަސް ދުވަހުގެ ތެރޭގައި ސިވިލް ކޯޓަށް ދެއްކުމަށް ހުކުމް ކުރާކަމަށެވެ.
