ރައީސް ސޯލިހް މިހެން ވިދާޅުވީ ހަނިމާދޫ އިންޓަނޭޝަނަލް އެއާޕޯޓް ތަރައްގީކުރުމުގެ މަޝްރޫއު މިރޭ ފައްޓަވާދެއްވުމުގެ ގޮތުން ދެއްކެވި ވާހަކަފުޅުގައެވެ.
މިރޭ ފެށިގެންދިޔަ މި ބިޔަ މަޝްރޫއަކީ ހަނިމާދޫ ރައްޔިތުންނާއި މުޅިއުތުރުގެ ރައްޔިތުންވެސް ދެކެމުންދިޔަ އެންމެ ބޮޑު ހުވަފެންކަމަށްވެސް ރައީސް ވިދާޅުވިއެވެ. އަދި މިއީ އުތުރާއި ބޮޑުތިލަދުންމަތީގެ ރައްޔިތުން ފަހުރުވެރިވާނެ އެއާޕޯޓަކަށް ވާނެކަމަށްވެސް ރައީސް ވިދާޅުވިއެވެ.
މިރޭގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ މި ތާރީހީ މަޝްރޫއު ނިމިގެންދާއިރު، ހަނިމާދޫ އިންޓަނޭޝަނަލް އެއަރޕޯޓަކީ ދުނިޔޭގެ އެކި ބައްރުތަކުން ބޮޑެތި މަތިންދާ ބޯޓް ފަހަރުގައި ގިނަ ފަސިންޖަރުން ދަތުރުކުރާނެ އެއާޕޯޓަކަށް ވެގެންދާނެ ކަމަށެވެ.
ރައީސް ވިދާޅުވީ އެއާޕޯޓް ތަރައްގީ ކުރުމުގެ އަގަކީ 136.6 މިލިއަން ޑޮލަރު ކަމަށާއި، އެ ފައިސާ ހުރީ ހަމަޖެހިފައި ކަމަށެވެ.
