ސަރުކާރުގެ ވިޔަފާރީގެ މައި ކުންފުނި، އެސްޓީއޯގެ މެނޭޖިން ޑިރެކްޓަރު ހުސެއިން އަމްރު، އެމްޑީޕީގެ ރިޔާސީ ޕްރައިމަރީގައި ރައީސް މުހައްމަދު ނަޝީދަށް ތާއީދު ކުރަން ނިންމަވައި، ނަޝީދުގެ ކެމްޕެއިނާ ގުޅިވަޑައިގެންފައި ވާއިރު، ބައެއް ފަރާތްތަކުން ގެންދަވަނީ އަމްރު މަގާމުން ދުރުކުރުމަށް ސަރުކާރަށް ގޮވާލަމުންނެވެ. 

ރައީސް މުހައްމަދު ނަޝީދުގެ ފޭކު ޓުވިޓާ އެކައުންޓެއް ކަމަށް ގިނަ ބަޔަކު ގަބޫލުކުރާ ހަސަން ކުރުސީގެ ނަމުގައި ހިންގާ އެކައުންޓުން ކުރި ޓުވީޓެއްގައި، އަމްރު މަގާމުން ދުރުކުރަން ސަރުކާރުން ފަސްޖެހެނީ، އަމްރު އަކީ ތައުލީމީ އަދި ހިންގުންތެރި ބޭފުޅެއް ކަމަށް ވުމުން ކަމަށް ވަނީ ބުނެފަ އެވެ.

މިޓުވީޓަށް ރައްދުދެއްވަމުން ރޮޒައިނާ ވިދާޅުވީ، އަމްރު އަކީ ރައީސް ސޯލިހު އައްޔަން ކުރެއްވި މަގާމެއްގައި ހުންނެވި ބޭފުޅެއް ކަމަށެވެ. ރައީސް އައްޔަން ކުރެއްވި މަގާމެއްގައި ހުންނަވައިގެން ރައީސް އާއި ދެކޮޅުވާނަމަ ރިވެތި ގޮތަކީ، މަގާމުން އިސްތިއުފާ ދެއްވުމަށްފަހު ނިކުމެވަޑައިގަތުން ކަމަށްވެސް ރޮޒައިނާ ވަނީ ވިދާޅުވެފަ އެވެ. 

ރޮޒައިނާ ވިދާޅުވި ވާހަކައިގެ މާނަ އޮޅޭ ގޮތަށް ބައެއް މީޑިއާ ތަކުން ހަބަރު ގެނެސްދިނުމާއި ގުޅިގެން ނުރުހުން ފާޅުުކުރައްވާ ރޮޒައިނާ މިއަދު ކުރެއްވި ޓުވީޓެއްގައި ވިދާޅުވީ، ދޮގު ހަބަރު ފެތުރުމަކީ، އެހާ ރީތި ގޮތެއް ނޫން ކަމަށާއިި، އެއްވެސް މީހަކު މަގާމުން ވަކިކުރުމަށް ގޮވާލާފައި ނުވާނެ ކަމަށެވެ. 

އަމްރު، ނަޝީދު ކޭމްޕެއިނާއި ގުޅިވަޑައިގެންނެވިއިރު، ނަޝީދުގެ ކޭމްޕުން ބުނަމުން އައީ ސަރުކާރުގެ ކުންފުނިތަކުން ވަޒީފާގެ ބިރު ދައްކަމުންދާ ކަމަށާއި ރައީސް ސޯލިހުގެ ކެމްޕެއިން އިވެންޓްތަކަށް ކުންފުނިތަކުގެ މުވައްޒަފުން ދާ މަޖުބޫރު ކުރާކަމަށެވެ.

އަމްރު ވަނީ ނަޝީދުގެ ވެރިކަމުގައި އެމްޓީސީސީގެ ސީއީއޯކަން ކުރައްވާފައެވެ. އަދި އަމްރުއަކީ  ކުރިން އެމްޑީޕީގެ ޕޮލިސީ ކޮމިޓީގެ ޗެއާ އެވެ. ރައްޔިތުންގެ މަޖިލީހުގެ އިންތިހާބު 2014 ގައި ތިނަދޫ ދާއިރާ އަށް ވެސް އަމްރު ވާދަކުރެއްވި އެވެ.