ބީއެމްއެލް އިން ބުނީ މިލުއިތަކުގެ ތެރޭގައި ބީއެމްއެލް ނޫން އެހެން ބޭންކެއްގައި ވޭތުވެދިޔަ 12 މަސްދުވަހު މުސާރަ ޖަމާވެފައިވާ ކަސްޓަމަރުން ބީއެމްއެލް ޕޭރޯލް މެދުވެރިކޮށް އެއް މަހު މުސާރަ ޖަމާކޮށްފައިވާނަމަ މިހާރު ލުއި އެކްސްޕްރެސް އަދި ބީއެމްއެލް އިސްލާމިކް ޕާސަނަލް ފައިނޭސިން އަށް އެދި ހުށަހެޅޭނެކަމަށެވެ.
އޭގެ އިތުރުން މިހާރު ވަޒީފާގައި އުޅޭކަމުގެ ލިޔުމެއް ބޭނުންނުވާނެ ކަމަށް ވެސް ބީއެމްއެލް އިން ވަނީ ބުނެފައެވެ.
ހަމައެހެންމެ 12 މަސްދުވަހު ވަޒީފާ އަދާކޮށްފައި، މިހާރު ވަޒީފާ އަދާކުރާތަނުގައި 3 މަސް ދުވަސް ހަމަވެފައިވާނަމަ ވެސް ލުއި އެކްސްޕްރެސް އަދި ބީއެމްއެލް އިސްލާމިކް ޕާސަނަލް ފައިނޭސިން އަށް އެދި ހުށަހެޅޭނެކަމަށް ބީއެމްއެލް އިން ވަނީ ބުނެފައެވެ.
އެ ބަދަލުތަކާއެކު ބޭންކުންވަނީ ލުއި އެކްސްޕްރެސް، ލުއި މައިކްރޯ، ބީއެމްއެލް ވެހިކަލް ލޯން، ބީއެމްއެލް އިސްލާމިކް ޕަސަނަލް ފައިނޭންސިން އަދި ބީއެމްއެލް އިސްލާމިކް ވެހިކަލް ފައިނޭންސިން އަށް އެދި ހުށަހަޅާ ކަސްޓަމަރުންނަށް ހާއްސަ ޕްރޮމޯޝަނެއް ފަށާފައެވެ.
މިއަދުން ފެށިގެން 30 އޭޕްރިލް އާ ދެމެދު ޕާސަނަލް ލޯނާއި ފައިނޭންސިން އަށް އެދި ހުށަހަޅާ ފަރާތްތަކަށް މި ޕްރޮމޯޝަންގައި ބައިވެރިވުމުގެ ފުރުސަތު ލިބިގެންދާނެއެވެ.
އެ ޕްރޮމޯޝަން ކުރިޔަށްދާ މުއްދަތުގައި ކޮންމެ ހަފްތާއަކު އެއް ފަރާތަކަށް އައިފޯނެއް ލިބޭނެއެވެ. އަދި މީގެ އިތުރުން ލުއި ލޯނާއި ބީއެމްއެލް އިސްލާމިކް ޕާސަނަލް ފައިނޭސިންއަށް އެދި ހުށަހަޅާ ކަސްޓަަމަރުންގެ ތެރެއިން ގުރުއަތުން ދެ ފަރާތް ހޮވުމަށް ވަނީ ހަމަޖެހިފައެވެ.
އެ ގޮތުން ހޮވޭ ކޮންމެ ފަރާތަކަށް 100،000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ. އަދި ހަމައެހެންމެ ވެހިކަލް ލޯނާއި ވެހިކަލް ފައިނޭންސިން އަށް އެދި ހުށަހަޅާ ފަރާތްތަކުގެ ތެރެއިން އެއްފަރާތަކަށް 50،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
އެ ބަދަލުތަކާ ގުޅޭ ގޮތުން ވާހަކަ ދައްކަވަމުން ބީއެމްއެލްގެ ޑިރެކްޓަރު އޮފް ބިޒްނަސް ކުލްދިޕް ޕަލިވަލް ވިދާޅުވީ ގެނެވުނު ބަދަލުތަކާއެކު ކަސްޓަމަރުންނަށް ފަސޭހަކަމާއެކު ޕާސަނަލް ލޯނާއި ފައިނޭންސިން ޕްރޮޑަކްޓްތަކަށް އެދި ހުށަހެޅޭނެ ކަމަށެވެ.
ލޯނުތަކަށް ގެނެވުނު ބަދަލުތައް ބީއެމްއެލް އިސްލާމިކްގެ ޕްރޮޑަކްޓްތަކަށްވެސް ގެނެވިފައިވާކަން ކުލްދިފް ވަނީ ފާހަގަކުރައްވާފައެވެ.
މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 38 ބްރާންޗް، 51 ސެލްފްސާވިސް ބޭންކިން ސެންޓަރު، 115 އޭޓީއެމް، 277 ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބޭންކް އޮފް މޯލްޑިވްސް ގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.
