އެފްޓެކް ކުންފުންޏަކީ، ރައީސް މުހައްމަދު ނަޝީދުގެ ވެރިކަމުގައި ސެޕްޓެމްބަރު 7، 2010 ގައި އޭރުގެ މިނިސްޓްރީ އޮފް ހެލްތު އެންޑް ފެމިލީން، މެޑިކަލް އަދި ލެބޯޓަރީ ކޮންސިއުމަބަލްސް ހޯދަން ހަވާލުކުރި ކުންފުންޏެވެ. އެ ކުންފުންޏަށް ސަރުކާރުން ދޫކުރި 12،784،849ރ. އަށްވާ މުދާ ފޯރުކޮށްދިނުމަށް އެއްބަސްވެފައިވެ އެވެ.
ހެލްތު މިނިސްޓްރީއާ އެފްޓެކް ކުންފުންޏާ ދެމެދު ހެދި އެއްބަސްވުމުގެ އަގަށް އެ ކުންފުނިން ފޯރުކޮށްދިނުމަށް އެއްބަސްވި މުދަލުގެ ތެރެއިން 11،852،555ރ. ގެ މުދާ ލިބިފައި ނުވާތީ ހެލްތު މިނިސްޓްރީން އޮގަސްޓް 1، 2019 ގައި އެ ކުންފުންޏާ ދެކޮޅަށް ސިވިލް ކޯޓުގައި ދައުވާކުރީ އެ ފައިސާ އާއި ލިކިއުޑޭޓެޑް ޑެމޭޖަސްގެ ގޮތުގައި 1،276،484ރ. ހޯދުމަށެވެ. އެ މައްސަލައިގެ ހުކުމް، ސިވިލް ކޯޓުން އިއްވީ އަންގާރަ ދުވަހު، އެ ކުންފުނީގެ ޣައިރު ހާޒިރުގައެވެ.
އެ މައްސަލައިގައި އެފްޓެކްގެ ގައިރު ހާޒިރުގައި ސިވިލް ކޯޓުން ކުރި ހުކުމުގައި ވަނީ، އެއްބަސްވުމުގެ ޖުމްލަ އަގު ކަމަށްވާ 12،784،849ރ. އެފްޓެކަށް ޖަމާކުރިކަން އެ ކުންފުނީގެ ސްޓޭޓް ބޭންކް އޮފް އިންޑިއާ (އެސްބީއައި)ގެ ބޭންކް އެކައުންޓުގެ ސްޓޭޓްމަންޓުތަކުން އެނގޭ ކަމަށެވެ.
އެ އެއްބަސްވުމުގައި އެ ކުންފުނިން ފޯރުކޮށްދިނުމަށް އެއްބަސްވި މުދަލުގެ ތެރެއިން ފޯރުކޮށްދީފައި ވަނީ 932،294ރ. އަށް ވާ މުދާކަން އޭސީސީގެ ތަހުގީގު ރިޕޯޓުން އެނގޭ ކަމަށް ހުކުމުގައިވެ އެވެ. އަދި 11،852،555ރ.ގެ މުދާ ދީފައި ނުވާއިރު އެ ފައިސާ އަކީ އަނބުރާ ދޭން ޖެހޭ ފައިސާ ކަމަށް ހުކުމުގައިވެ އެވެ.
ރައީސް ނަޝީދުގެ ވެރިކަމުގައި އެފްޓެކާ މި މަސައްކަތް ހަވާލުކުރީ، އެންޓި ކޮރަޕްޝަން ކޮމިޝަން (އޭސީސީ)ން އެކަން އެގޮތަށް ނުކުރެވޭނެ ކަމަށް ފިނޭންސް މިނިސްޓްރީއަށް އަންގާފައި ވަނިކޮށެވެ. މި މައްސަލައިގައި ކުރި ހާއްސަ އޮޑިޓު ރިޕޯޓުގައިވާ ގޮތުގައި އެފްޓެކަކީ މެޑިކަލް ސާމާނު އިމްޕޯޓު ކުރުމުގެ ލައިސެންސް ނޯންނާތީ ބީލަމަށް ޝަރުތު ހަމަވާ ކުންފުންޏެ ނޫނެވެ.
އަދި ބީލަން ކާމިޔާބުކުރަން މަސައްކަތުގެ ތަޖުރިބާހުރި ކަމަށް ދައްކަން އޭރުގެ ހެލްތު އެންޑް ފެމިލީ މިނިސްޓްރީއަށާއި ޑިޕާޓްމަންޓް އޮފް މެޑިކަލް ސާވިސަސްއަށް މެޑިކަލް ސާމާނު ފޯރުކޮށްދިން ކަމަށް ބުނެ ދޮގު މައުލޫމާތު ހުށަހެޅި ކަމަށް އޮޑިޓް ރިޕޯޓުގައި ވެއެވެ.
މައްސަލަ ކޯޓްގައި ހިނގަމުން ދަނިކޮށް އިކޮނޮމިކް މިނިސްޓްރީ އެކުންފުނި އުވާވެސް ލިއެވެ. ނަމަވެސް އުވާލާފައިވާ ކުންފުންޏަކާއި ދެކޮޅަށް ދައުވާ ކުރިއަށް ނުގެންދެވޭނެކަމަށް ކޯޓުން ބުނުމުން އަލުން ކުންފުނި ރެޖިސްޓްރީގައި ހިމެނިއެވެ. ނަމަވެސް ނުވަ އަހަރު ފަހުން ކޯޓުން މައްސަލަ ނިންމިއިރުވެސް އެފްޓެކްގެ އެއްވެސް ފަރާތެއް ކޯޓަށް ހާޒިރު ކުރެވިފައިވެސް ނުވެއެވެ.
މިހާރުވެސް އުވާލުމުގެ މަރުހަލާގައިވާ އެފްޓެކް ސޮލިއުޝަންސްގެ ހިއްސާދާރުންނަކީ މުހައްމަދު އަބްދުﷲ ކިޔާ މީހަކާއި އާއި އައިމިނަތު ނަޖުމާ ކިޔާމީހެކެވެ. ކުރީގެ ހަބަރުތަކުން އެނގޭ ގޮތުގައި އެ ކުންފުންޏަކީ، ނަޝީދުގެ ސަރުކާރުގައި ތިބި އެމްޑީޕީގެ އެކްޓިވިސްޓުންތަކަކާ ގުޅުން ހުރި ކުންފުންޏެކެވެ.
