ޕްރައިމަރީގެ ވޯޓުލުން ނިމި، ވޯޓު ގުނަން ފެށިތާ ކުޑައިރުކޮޅެއްތެރޭ ދެ ކެންޑިިޑޭޓުންގެ ފަރާތުންވެސް ވަނީ އެގްޒިޓް ޕޯލް އިން އިންތިހާބު ކާމިޔާބުވެފައިވާ ކަމަށް ދައްކާތީ، މޮޅު އިއުލާންކޮށްފަ އެވެ.
އެގޮތުން ފުރަތަމަ މިކަން އިއުލާންކުރީ ރައީސް ނަޝީދުގެ ޓީމުގެ ފަރާތުން ނެވެ. އެ ޓީމުން މޮޅު އިއުލާންކޮށް ކުރު ބަޔާނެއްވެސް ނެރެފައިވެއެވެ. އެބަޔާނުގައި ބުނެފައިވަނީ، އެގްޒިޓް ޕޯލްތަކުން 64 އިންސައްތައިގެ ތަނަވަސް އަގުލަބިއްޔަތަކުން ރައީސް ނަޝީދު ޕްރައިމަރީ ކާމިޔާބު ކުރެއްވި ކަމަށެވެ.
ނަޝީދުގެ ފަރާތުން ކާމިޔާބީ އިއުލާންކުރުން
މީގެ އިތުރުން އޭގެ ކުޑައިރުކޮޅެއްފަހުން ރައީސް ސޯލިހްގެ ޓީމުގެ ފަރާތުންވެސް އެގްޒިޓް ޕޯލްތަކާއި ހަވާލާދީ ކާމިޔާބީ އިއުލާންކޮށްފައި ވެއެވެ.
ރައީސް ސޯލިހް ޓީމުން ކުރި ޓުވީޓުގައި ބުނިގޮތުން ރައީސް ސޯލިހް 67 އިންސައްތައިން މި އިންތިހާބު ކާމިޔާބުކުރައްވައިފި ކަމަށް އެގްޒިޓް ޕޯލްތަކުން ދައްކަ އެވެ. އަދި ކާމިޔާބީއަށް މަރުހަބާވެސް ވަނީ ކިޔާފަ އެވެ.
ދެ ކެންޑިޑޭޓުންގެ ފަރާތުން ކާމިޔާބީ އިއުލާންކުރިއިރު، އަދި ހުރިހާ ފޮށިތަކެއްގެ ވޯޓު ގުނާ ނުނިމެއެވެ. މި އިންތިހާބުގައި ޖުމްލަ 243 ވޯޓު ފޮށި ބެހެއްޓިއިރު މިހާތަނަށް ކުރީގައި އުޅުއްވަނީ 19،000އަށްވުރެ ގިނަ ވޯޓާއިއެކު ރައީސް ސޯލިހް އެވެ. އެއީ ވޯޓުގެ 62 އިންސައްތަ އެވެ.
ނަޝީދަށް މިހާތަނަށް ލިބިވަޑައިގެންކަމަށް ވަގުތީ ނަތީޖާއިން ދައްކަނީ، 12،000 އެއްހާ ވޯޓެވެ. އެއީ ވޯޓުގެ 38 އިންސައްތަ އެވެ.
ބާކީ ނުގުނި 54 ވޯޓު ފޮށި ހުރި އިރު މި އިންތިހާބުގައި 30،000 މެމްބަރުން ވަނީ ވޯޓުލާފަ އެވެ. ޖުމްލަ 57،000 މެމްބަރުންނަށް ވޯޓު ލިބުމުގެ ހައްގު ލިބުނެވެ.
