އިންތިހާބުގެ ވަގުތީ ނަތީޖާ ދައްކަގޮތުން މުޅިރާއްޖެއިން ޕްރައިމަރީގައި އިއްޔެ 40887 މީހުން ވޯޓް ލިއެވެ. ވޯޓް ލުމުގެ ހައްގު ލިބިގެންވަނީ 57255 މީހުންނަށެވެ.

އެމްޑީޕީގެ ޕްރައިމަރީގައި ވާދަކުރެއްވީ ރައީސް އިބްރާހިމް މުހައްމަދު ސޯލިހްއާއި ރައީސް މުހައްމަދު ނަޝީދެވެ. ބޮޑު ތަފާތަކުން ކާމިޔާބުކުރައްވާ އެމްޑީޕީގެ ރިޔާސީ ޓިކެޓް ކަށަވަރުކުރެއްވީ ރައީސް ސޯލިހެވެ.

އިއްޔެގެ ޕްރައިމަރީގައި ރައީސް ސޯލިހަށް 24566 ވޯޓް ލިބިވަޑައިގެންނެވިއިރު އެއީ ސައްހަ ވޯޓްގެ 61.10 އިންސައްތައެވެ. ރައީސް ނަޝީދަށް 15641 ވޯޓް ލިބިވަޑައިގެންނެވިއިރު އެއީ 38.90 އިންސައްތައެވެ. އިއްޔެގެ ޕްރައިމަރީގައި 680 ބާތިލް ވޯޓް ލާފައިވެއެވެ.

ޕްރައިމަރީ ކާމިޔާބު ކުރައްވާ ރައީސް ސޯލިހް ރޭ އުފާފާޅުކުރެއްވިއިރު ރައީސް ނަޝީދު ގެންދަވަނީ ވޯޓް އޮޅުވާލާފައިކަމަށް ވިދާޅުވެ، ނަތީޖާ ގަބޫލު ނުކުރަށްވާކަމަށް ވިދާޅުވަމުންނެވެ.

މިއަހަރުގެ ރިޔާސީ އިންތިހާބުގެ ފުރަތަމަ ބުރު އޮންނާނީ އަންނަ ސެޕްޓެމްބަރު މަހުގެ 9 ވަނަ ދުވަހު އެވެ.