ގާނޫނު ބުނާގޮތުން ކޮންމެ އަހަރެއްގެ ރައްޔިތުންގެ މަޖިލިސް ހުޅުވާ ޖަލްސާގައި ރައީސުލްޖުމްހޫރިއްޔާ އިއްވަވާ ރިޔާސީ ބަޔާނަށް މަޖިލީހުގެ މައިނޯރިޓީ ލީޑަރު ޖަވާބު ދެއްވަން ޖެހިވަޑައިގަންނަވައެވެ. ރައްޔިތުންގެ މަޖިލީހުގެ މިހާރުގެ މައިނޯރިޓީ ލީޑަރަކީ އޭދަފުށީ ދާއިރާހެ މެމްބަރު އަހުމަދު ސަލީމް އެވެ.
ރައީސް އިބްރާހިމް މުހައްމަދު ސޯލިހް މިއަދު ރިޔާސީ ބަޔާން އިއްވަވަން ފެއްޓެވުމުން، އިދިކޮޅު މެމްބަރުންވަނީ އަޑުގަދަކޮށް ރިޔާސީބަޔާން އިއްވުމަށް ހުރަސްއަޅާފައެވެ. އެއާއިއެކު މިއަދުގެ މަޖިލިސް ކުރިއަށް ގެންދިޔައީ ނަންއިއްވާ، އިދިކޮޅު މެމްބަރުން މަޖިލީހުން ނެރުމަށް ފަހުއެވެ.
މަޖިލީހުގެ ހަމަނުޖެހުންތަކަށްފަހު، އިދިކޮޅު ޕީޕީއެމް ޕީއެންސީ ކޯލިޝަނުން، މިއަދު ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ނައިބު ރައީސް އަހުމަދު ޝިޔާމު ވިދާޅުވީ ރައީސްގެ ސާޖަރީއަކަށް ސިންގަޕޫރަށް ވަޑައިގެން، ނައިބު ރައީސް ފައިސަލް ނަސީމަށް ރައީސުލްޖުމްހޫރިއްޔާގެ ހުވާލާދެއްވާ މަގާމުގެ މަސްއޫލިއްޔަތު ހަވާލު ކުރެއްވިކަމަށެވެ.
ނައިބު ރައީސް ކަމުގެ މަގާމުގައި ހުންނަވާބޭފުޅަކީ ރައީސުލްޖުމްހޫރިއްޔާގެ މަސްއޫލިއްޔަތު އަދާކުރައްވަން ޖެހިވަޑައިގަންނަވާ ވަގުތެއްގައި އެ މަސްއޫލިއްޔަތު އަދާކުރެއްވުމަށް ހުވާކުރަށްވައިގެން ހުންނަވާ ބޭފުޅެއްކަމަށް ޝިޔާމް ވިދާޅުވިއެވެ. އެހެން ކަމުން ނައިބު ރައީސް އަލުން ރައީސުލްޖުމްހޫރިއްޔާގެ ހުވާކުރައްވަން ޖެހިވަޑައި ނުގަންނަވާނެކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ ރައީސުލްޖުމްހޫރިއްޔާގެ ބާރުތައް ނައިބު ރައީސްއާއި ހަވާލުކުރައްވާ، ހުވާކުރެއްވުމަށްފަހު، ގާނޫނީގޮތުން އެ ބާރުތަކާއި ރައީސް ސޯލިހް ހަވާލުވެވަޑައިގެންފައި ނުވާކަމަށެވެ. އަދި ނައިބު ރައީސް ރައީސް ކަމުގެ ހުވާކުރައްވައިފިނަމަ އަލުން ރައީސްއަށް ރައީސްގެ މަސްއޫލިއްޔަތާއި ހަވާލުވެވޭނެކަމަށް ގަބޫލު ނުކުރައްވާކަމަށްވެސް ޝިޔާމް ވިދާޅުވިއެވެ.
ޝިޔާމް ވިދާޅުވީ އިދިކޮޅުން ގަބޫލުކުރަނީ ރާއްޖޭގެ މިހާރުގެ ގާނޫނީ ރައީސްއަކީ ފައިސަލް ނަސީމުކަމަށާއި އެހެންކަމުން މިއަދު އިއްވި ރިޔާސީ ބަޔާނަށް ޖަވާބުދޭން ނުވެސް ޖެހޭނެކަމަށެވެ.
މަޖިލީހުގެ މައިނޯރިޓީ މެމްބަރު އަހުމަދު ސަލީމްވެސް ވިދާޅުވީ ރައީސް ސޯލިހަކީ ގާނޫނީގޮތުން ރާއްޖޭގެ ރައީސްކަމަށް ގަބޫލު ނުކުރައްވާކަމަށާއި އެހެންކަމުން ރިޔާސީ ބަޔާނަށް ދޭންޖެހޭނެ ޖަވާބެއް އޮންނާނެކަމަށް ގަބޫލު ނުކުރައްވާކަމަށެވެ.