ހިލޭ ޓްރާންސްފާއެއްގައި ބަދަލުވި ޕޮގްބާއަށް އަނިޔާގެ ސަބަބުން ޔުވެންޓަސްއަށް އަދި މި ފަހަރު އެންމެ މެޗެއްވެސް ނުކުޅެވެއެވެ. އެހެން އެކަން އޮއްވާ މާލީ ބަޔާންތަކަށް މަކަރު ހެދިކަމުގެ ކުށުގައި ޔުވެންޓަސްއަސް ވަނީ ބޮޑު އަދަބަކާ ކުރިމަތިލާން ޖެހިފައެވެ.
ޔުވެންޓަސްއަށް އިޓަލީ ލީގުގައި ލިބިފައިވާ ޕޮއިންޓްގެ ތެރެއިން 15 ޕޮއިންޓް އުނިކުރުމާއެކު އެ ޓީމަށްވަނީ ބޮޑެތި މައްސަލަތަކެއް ދިމާވެފައެވެ. ދިމާވެފައިވާ މައްސަލަތަކުން އަރައިގަތުމުގެ ޕްލޭންގެ ތެރޭގައި ޕޮގްބާއާއެކު ހަދާފައިވާ ހަތަރު އަހަރުގެ ކޮންޓްރެކްޓް ބާތިލް ކުރުންވެސް ހިމެނޭ ކަމަށް ރިޕޯޓްތައް ބުނެއެވެ. އެކަމަކު ޔުވެންޓަސްއިން ރަސްމީކޮށް އެކަން ކަށަވަރުކޮށް ނުދެއެވެ.
ޔުވެންޓަސް އިން، 2019 އާއި 2021 އާ ދެމެދު ހަދާފައިވާ ޓްރާންސްފާތަކާ ގުޅޭ ހިސާބުތައް އޮޅުވާލާފައިވާ މައްސަލައިގެ ތަހުގީގު ނިންމައި، އިޓަލީ ފެޑެރޭޝަނުން، ޔުވެންޓަސްގެ 15 ޕޮއިންޓް އުނިކުރިއިރު، އެ ޓީމު މިހާރު އޮތީ ލީގު ތާވަލުގެ 10 ވަނައިގަ އެވެ.
