ރައީސް އިބްރާހިމް މުހައްމަދު ސާލިހު ގެންގުޅުއްވާ ބިންވެރިކަމުގެ ސިޔާސަތުގެ ތަކުގެ ސަބަބުން ވެސް އެތައް ބައެއްގެ ނަފްސާނީ ދުޅަހެޔޮކަން އިތުރުވާނެކަމަށް ހެވޭރު ދެކުނު މެމްބަރު ހުސައިން ޝަހީމް، (އަނދުން ހުސެން) ވިދާޅުވެއްޖެއެވެ.
Advertisement
ރައްޔިތުންގެ މަޖިލީހުގެ ޖަލްސާގައި ބުދަ ދުވަހު ވާހަކަ ދައްކަވަމުން އަނދުން ހުސެން ވިދާޅުވީ، ނަފްސާނީ މައްސަލަތަކަކީ ހަމައެކަނި ބޭސްގުޅައެއް ދީގެން ރަނގަޅުވާނެ ކަމެއް ނޫންކަމަށެވެ.
އަދި ނަފްސާނީ ގިނަ މައްސަލަތައް ގުޅިފައިވަނީ ދިރިއުޅުމިގެ ހާލަތާކަމަށެވެ. އަދި މާލޭން ގޯތި ލިބުމުން އެ މައްސަލަތައް ހައްލުވެ، ރައްޔިތުންގެ ހިތައް އަރާމުލިބޭނެކަމަށެވެ.
"އާންމު ރައްޔިތުންގެ ހިތައް އަންނާނެ އުފާފާގަތިކަން އަޅުގަނޑުގެ ހިތައް އިހުސާސްކުރެވޭ. ނަފްސާނީ ކަންކަމަކީ ބޭސްގުޅައެއް ދީގެންނެއް މުޅިއަކުން ފިލާނެ ކަންކަމެއް ނޫން. އެކަން ފެށިގެން އަންނަ ހިސާބެއް ވެސް އެނގިގެން އެ ހިސާބެއް ވެސް ޖެހިގެން އެކަންކަން ދިމާވަނީ ކީއްވެތޯ ބެލިގެން އެތައި ބައިވަރު ކަންތައްތަކެއް ވަށާޖެހޭގޮތައް ކުރަންޖެހޭތީ ރާއްޖޭގެ ސަރުކާރުން މާލޭގެ ރައްޔިތުން ވެއްޓިފައިމިވާ ނުތަނަވަސްކަން އަދި ނަފްސާނީ މައްސަލަތައް އަންނަން ދިމާވާ މައިގަނޑު ސަބަބުކަމުގައިވާ ދިރިއުޅުމުގެ ފިކުރާ އުޅެންޖެހޭ ހާލުގެ ނިކަމެތިކަމުން މާލޭ ސަރަހައްދުގެ ރައްޔިތުން ސަލާމަތްކުރުމަށް ޖޫން މަހުގެ ކުރިން އެމަނިކުފާނު ދެއްވަން ނިންމަވާފައިވާ ގޯތީގެ ސަބަބުން އުފާ ފާގަތިކަން ލިބޭނެ،" އަނދުން ހުސެން ވިދާޅުވިއެވެ.
އަނދުން ހުސެން ވިދާޅުވީ 5000 ގޯތީގެ އިތުރުން ވެސް އިތުރު ގޯތި ދެއްވާނެކަމަށް ރައީސް ވިދާޅުވެފައިވާކަމަށާއި، އެހްކަމުން މިހާރު މާލޭގައި ހުރި ކޮންމެ ގޯއްޗަކަށް ގޯއްޗެއް ލިބިގެންދާނެކަމަށެވެ. އަދި ރައީސް ސާލިހުގެ ސަރުކާރުން އަޅާ 12،000 ފްލެޓްގެ ތެރެއިން 4،000 ފްލެޓް ވެސް މިއަހަރު ނިންމާއި ހަވާލުކުރެވޭނެކަމަށެވެ.
އަނދުން ހުސެން ވިދާޅުވީ، އޭނާ ރައީސް ސާލިހަށް ތާއީދު ކުރައްވާ އެންމެ މައިގަނޑު އެއް ސަބަބަކީ ވެސް ރައީސް ސާލިހު މާލެ ސަރަހައްދަށް ގެންގުޅުއްވާ ބިންވެރިކަމުގެ ސިޔާސަތު ކަމަށެވެ.
