ރާއްޖޭގެ އެކި ހިސާބުތަކަށް ކާޑުގެ ބާވަތްތައް ފޯރުކޮށްދިނުމަށް އެސްޓީއޯއިން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން ކުރެވެމުންދާ މަސައްކަތްތަކުގެ ތެރެއިން މި އަހަރުގެ ފުރަތަމަ މަހު ރާއްޖޭގެ އެކި ސަރަހައްދުތަކަށް ކާޑުގެ ބާވަތްތައް ފޮނުވާފައިވާ ގޮތުގެ ތަފާސް ހިސާބުތައް އެސްޓީއޯއިން ވަނީ އާންމުކޮށްފައެވެ.
ޖެނުއަރީ މަހުގެ ތެރޭގައި އެސްޓީއޯއިން ވިއްކާފައިވާ ކާޑުގެ ބާވަތްތައް:
- ހަނޑޫ - 41،683 ބަސްތާ
- ހަކުރު - 14،928 ބަސްތާ
- ގޮދަން ފުށް - 33،298 ބަސްތާ
އެސްޓީއޯއިން ބުނެފައިވާ ގޮތުގައި މިދިޔަ މަހު މާލެ ސަރަހައްދުން 1،601 ފަރާތަކަށް 20،706 ބަސްތާ ހަނޑުލާއި 7،431 ބަސްތާގެ ހަކުރު އަދި 15،565 ބަސްތާގެ ފުށް ފޯރުކޮށްދީފައިވާ ކަމުގައެވެ.
ފާއިތުވެދިޔަ މަހު އެ ކުންފުނީގެ ނުވަ ރީޖަނަލް ފިހާރައަށް 3،340 ބަސްތާ ހަނޑުލާއި 1،390 ބަސްތާ ހަކުރުގެ އިތުރުން 4،600 ބަސްތާ ފުށް ފޮނުވާފައިވާ ކަމަށް އެސްޓީއޯގެ ތަފާސް ހިސާބުތަކުން ދައްކައެވެ.
އަތޮޅުތެރެއަށް ބޭނުންވާ ކާޑުގެ ބާވަތްތައް އެސްޓީއޯއިން ފޯރުކޮށްދެމުން ދަނީ އެ ކުންފުނީގެ ކާޑު އެޖެންޓުން މެދުވެރިކޮށެވެ. އެގޮތުން ޖެނުއަރީ މަހު އެ ކުންފުނީގެ ކާޑު އެޖެންޓުންގެ ގޮތުގައި ތިބި 578 ފަރާތެއް މެދުވެރިކޮށް ރަށްތަކަށް 17،637 ބަސްތާ ހަނޑޫ، 6،107 ބަސްތާ ހަކުރު އަދި 13،133 ބަސްތާގެ ފުށް ފޮނުވާފައިވެއެވެ.
