ސިރީލަންކާގައި ކުރިއަށް ދިޔަ ދާހިލީ ހަނގުރާމާގައި މަރުވެފައިވާކަމަށް ލަންކާ ސަރުކާރުން ނިންމާފައިވާ ޓެމިލް ޓައިގަރުންގެ ކުރީގެ ލީޑަރު ވެލިޕެއްލެ ޕްރަބާކަރަން މަރު ނުވާކަމަށް ޓެމިލް ނެޝަނަލިސްޓު ލީޑަރު ޕަޒާ ނޭޑޫމާރަން ބުނެފިއެވެ.
ޕްރަބާކަރަން މަރުވިކަމަށް ރާޖަޕަކްސާގެ ސަރުކާރުން އިއުލާނުކުރީ 2009 ވަނަ އަަހަރުގެ މޭމަހުގެ ތެރޭގައެވެ.
ލަންކާ ސަރުކާރުން ޓެމިލް ޓައިގަރުންނާ ދެކޮޅަށް ކުރި ހަނގުރާމާގައި ޕްރަބާކަރަން މަރާލައި އޭނާގެ ހަށިގަނޑުން ޑީއެންއޭވެސް އޭރު ޓެސްޓުކުރިއެވެ.
ހޯމަ ދުވަހު އުމުރުން 89 އަހަރުގެ ނެޑޫމާރަން ތަންޖާވޫރުގައި ބޭއްވި ނޫސްވެރިންގެ ބައްދަލުވުމުގައި ބުނީ، " ޕްރަބާކަރަން އަދިވެސް ދިރި އެބަހުރި. ރަނގަޅު ހާލަތުގައި އެބަ ހުރި. އޭނާގެ ތަމަޅަ އީލާމް މިނިވަންކުރާނެ ޕްލޭން ވަރަށް އަވަހަށް އިއުލާން ކުރާނެ،" ކަމަށެވެ.
އަދި ދުނިޔޭގެ އެކި ކަންކޮޅުތަކުގައި ތިބި ތަމަޅަ މީހުންނަށް ޕްރަބާކަރަންއަށް "މަރުހަބާ ކިޔުމަށް ނުކުތުމަށް" ވެސް ނޭޑޫމާރަން ވަނީ އިލްތިމާސް ކުރައްވާފަ އެވެ.
އަދި އެލްޓީޓީ ބާރުގައި އޮތްއިރު ލަންކާގެ ބިން ބޭނުން ކުރުމުގެ ހުއްދަ "އިންޑިއާއާ ދެކޮޅު އެއްވެސް" ބާރަކަށް ދީފައި ނުވާ ކަމަށް ވެސް ތަމަޅަ ލީޑަރު ބުންޏެވެ.
ޕަޒާ ނެޑޫމާރަން
“އެލްޓީޓީއީ އުޅުނުއިރު ދުވަހަކުވެސް އިންޑިއާއާ ދެކޮޅު އެއްވެސް ބާރަކަށް ލަންކާގެ ބިން ބޭނުންކުރަން ނުދޭ. އެކަމަކު އަޅުގަނޑުމެންނަށް ފެންނަނީ ލަންކާގައި ޗައިނާގެ ނުފޫޒު ބޮޑުވެ، ޗައިނާއިން މިހާރު ލަންކާ ކޮންޓްރޯލް ކުރަމުންދާކަން... އިންޑިއާ ކަނޑުގެ މައްޗަށް ވެސް އެމީހުންނަށް އިތުރު ބާރެއް ލިބެމުންދާކަން. މި ޖިއޮޕޮލިޓިކަލް ހާލަތު ހުއްޓުވުމަށްޓަކައި ކުރަންޖެހޭ ކަންތައްތައް ކޮށްދިނުމަށް އިންޑިއާ ސަރުކާރުގައި އެދެން،” އޭނާ ބުންޏެވެ.
ޕަޒާ ނެޑޫމާރަން އަކީ ލިޔުންތެރިއެއްގެ އިތުރުން ތަމަަޅައިންގެ ހައްގުގައި ވަކާލާތުކުރާ އެކްޓިވިސްޓެކެވެ. ތަމަޅަ ބައި-ވީކްލީ ތެން ސެއިޑީގެ އެޑިޓާ އިން ޗީފް އަދި ކޮންގްރެސް ޕާޓީގެ ކުރީގެ މެންބަރެކެވެ. އޭނާ އަކީ އިންޑިއާގެ ތަމިލްނާޑޫގެ ކުރީގެ ޗީފް މިނިސްޓަރު ކޭ ކަމަރާޖްއާއި ގާތް ބޭފުޅެކެވެ.
