ޝަރުއީ ދާއިރާގެ މުވައްޒަފުންނަށް މުސާރައިގެ ކުރިއެރުން ދިނުން ލާޒިމުކޮށްފައިވަނީ ޝަރުއީ ދާއިރާގެ މުވައްޒަފުންގެ ގަވާއިދުގެ 41 ވަނަ މާއްދާގެ ދަށުންނެވެ. އެ މާއްދާގައި ބުނެފައިވަނީ މުވައްޒަފުންގެ މަސައްކަތުގެ ފެންވަރު ބެލުމުގެ އުސޫލުން ކަމަށެވެ.
މި އުސޫލުގެ ދަށުން ދޭންޖެހޭ މުސާރައިގެ ކުރިއެރުން ނުދީގެން އެ މައްސަލަ ވަޒީފާއާ ބެހޭ ޓްރައިބިއުނަލަށް ހުށަހަޅައި މައްސަލަ ކުރިއަށްދަނިކޮށް، ޗީފް ޖުޑީޝަލް އެޑްމިނިސްޓްރޭޓަރު އައިޝަތު ރިޒުނާވަނީ މިދިޔަ ބުދަ ދުވަހު ނެރުނު ކުރު ސާކިއުލާއަކުން ޝަރުއީ ދާއިރާގެ މުވައްޒަފުންގެ ގަވައިދުގެ 41 ވަނަ މާއްދާ ބާތިލުކޮށްފައެވެ.
ޝަރުއީ ދާއިރާގެ މުވައްޒަފުންނަށް މުސާރައިގެ ކުރިއެރުން ދިނުމާ ބެހޭ މާއްދާ، މުވައްޒަފުންގެ ގަވައިދުން ބާތިލުކުރިއިރު، ޖުޑީޝަލް އަހަރު ފެށުމުގެ ގޮތުން ބޭއްވި ޖަލްސާގައި ރައީސް އިބްރާހީމް މުހައްމަދު ސާލިހް ދެއްކެވި ވާހަކަފުޅުގައި ޝަރުއީ ދާއިރާގެ މުސާރައަށް ހެޔޮ ބަދަލެއް އަންނާނެ ކަމުގެ އިޝާރާތެއްވަނީ ދެއްވާފައެވެ.
ޝަރުއީ ދާއިރާގެ މުވައްޒަފުންގެ ގަވާއިދުގެ ދަށުން ކޮންމެ ދެ އަހަރުން އެއް އަހަރު މުވައްޒަފުންގެ މަސައްކަތުގެ ފެންވަރު ބެލުމަށްފަހު 70 ޕަސެންޓަށް ވުރެ މަތިން މާކްސް ލިބޭ މުވައްޒަފުންނަށް 200ރ. ގެ މުސާރައިގެ ކުރިއެރުމެއް ދޭންޖެހޭ ކަމަށް ބުނާ މާއްދާ ޗީފް ޖުޑީޝަލް އެޑްމިނިސްޓޭޓަރުގެ ސާކިއުލާއަކުން ބާތިލު ކުރިއިރު، މުވައްޒަފުންނަށް އެ ފައިސާ ނުދޭތާ ހަތަރު އަހަރު ވަނީ ވެފަ އެވެ.
މުސާރައިގެ ކުރިއެރުން ނުދީގެން އެ މައްސަލަ ވަޒީފާއާބެހޭ ޓްރައިބިއުނަލަށް ހުށަހަޅާފައިވަނީ މިދިޔަ އަހަރުގެ ސެޕްޓެމްބަރު މަހު ތެރޭއެވެ. އެ މައްސަލަ ހުށަހެޅީ ސިވިލް ކޯޓުގެ ލީގަލް މުވައްޒަފުންތަކެކެވެ.
