ސަރުކާރުގެ އާ އޮފީސް އިމާރާތް، އުމަރު ޒާހިރު އޮފީސް އިމާރާތަށް ޓްރާންސްޕޯޓް މިނިސްޓްރީ ބަދަލުކުރުމުގެ މަސައްކަތް ކުރުމަށް މިދިޔަ ބުރާސްފަތިން ފެށިގެން އާދިއްތަ ދުވަހުގެ ނިޔަލަށް ހިދުމަތްތައް ދިނުން ވަނީ މެދުކަނޑާލާފަ އެވެ.
މިއަދު ޓްރާންސްޕޯޓް މިނިސްޓްރީން ބުނީ، އާދީއްތަ އިން ފެށިގެން، އެ މިނިސްޓްރީ ހިނގަމުންދާނީ ހުޅުމާލޭގެ (ފޭސް 1) އޯކިޑްމާ ހިނގުމުގައި ހުންނަ އުމަރު ޒާހިރު އޮފީސް އިމާރާތުގެ 3 ވަނަ ފަންގިފިލާ ގަ ކަމަށެވެ.
މި ބަދަލާއެކު، އެ މިނިސްޓްރީގެ ކައުންޓަރުތަކުން ފޯރުކޮށްދޭ ހިދުމަތްތައް ދިނުމަށް ހަމަޖެހިފައިވަނީ އިމާރާތުގެ ގްރައުންޑް ފްލޯގައި ގާއިމުކޮށްފައިވާ އެ މިނިސްޓްރީގެ ކައުންޓަރުން ނެވެ.
ޓްރާންސްޕޯޓް މިިނިސްޓްރީ ހިންގަމުންދިޔައީ، މާލޭގެ މަޖީދީމަގުގައި ހުންނަ ސްޓާ ކަލައުޑްގެ ހަތަރުވަނަ ފަންގިފިލާގައެވެ.
އުމަރު ޒާހިރު އޮފީސް އިމާރާތުގައި ސަރުކާރުގެ ތިން މިނިސްޓްރީއެއް ހިންގާނެ އެވެ. އެއީ ޓްރާންސްޕޯޓް މިނިސްޓްރީ ހިމެނޭހެން ހަޔާ އެޑިއުކޭޝަން މިނިސްޓްރީ އަދި ޖެންޑާ މިނިސްޓްރީ އެވެ. ޖެންޑާ މިނިސްޓްރީ މިހާރު ވަނީ އެ އިމާރާތައް ބަދަލުކޮށްފަ އެވެ.
ހަޔާ އެޑިއުކޭޝަން ވެސް މި ހަފްތާގައި އެ އިމާރާތައް ބަދަލުކުރާނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވަނީ ވިދާޅުވެފައެވެ.
ހުޅުމާލޭގައި މި އޮފީސް އިމާރާތް، އެޅީ ސަރުކާރުގެ ގިނަ އޮފީސްތަކެއް ބޮޑު ހޭދައެއް ކޮށްގެން، އަމިއްލަ ތަންތަނުގައި މުއްދަތެއް ނެތް ގޮތަށް ކުއްޔަށް ހިފައިގެން އުޅެން ޖެހޭތީ އެކަމަށް ހައްލެއް ގެންނަން ރައީސް އިބްރާހިމް މުހައްމަދު ސޯލިހު 2019 ގައި ނިންމެވުމާ ގުޅިގެންނެވެ.
އުމަރު ޒާހިރު އޮފީސް އިމާރާތަކީ 6 ފަންގިފިލާގެ އިމާރާތެކެވެ. އަދި ކޮންމެ ފަންގިފިލާއެއްގައި ޒަމާނީ ވަސީލަތްތަކާއެކު 25000 އަކަފޫޓުގެ ބޮޑުމިނުގައި އޮފީސް ހިންގުމަށް ޖާގަ ހިމެނެ އެވެ. މި އޮފީސް އިމާރާތާއި އެކު 21 ކާރާއި، 360 ސައިކަލު ޕާކު ކުރެވޭނެ ޕާކިން ޒޯނެއްވެސް ވަނީ ގާުއިމު ކޮށްފަ އެވެ.
