އެމްޑީޕީ އެތެރޭގައި އުފެދިފައިވާ ދެ ފެކްޝަންގެ ތެރެއިން ރައީސް އިބްރާހިމް މުހައްމަދު ސާލިހުގެ ފެކްޝަނަށް ނިސްބަތްވެ ވަޑައިގަންނަވާ، މަވޯޓާ ޝަރީފްގެ މި ގަރާރަށް ތާއީދު ކުރައްވާކަން ހާމަކުރެއްވުންވީ ގިނަބަޔަކަށް އަޖައިބަކަށެވެ.
ސަބަބަކީ މުއިއްޒު ހުށަހަޅުއްވާފައިވާ ގަރާރަކީ "ސަރުކާރަށް ޖެއްސުމަށް" ހުށަހަޅާފައިވާ ގަރާރެއް ކަމަށް ރައީސް ސާލިހު ފެކްޝަނުގެ ބައެއް މެންބަރުން ތުހުމަތުކުރައްވާފައިވާތީއެވެ.
ޝަރީފް ވިދާޅުވީ ސަރުކާރު އޮފީސްތައް ހިންގުމަށް ހުޅުމަލޭގައި "އުމަރު ޒާހިރު އޮފީސް" ނަމުގައި އިމާރާތެއް ހުޅިވިގެން ދިޔަދިއުމަކީ ކުރިއަށް އެޅުނު ރަނގަޅު ފިޔަވަޅެއްކަމުގައި ގަބޫލުކުރައްވާކަމަށެވެ. ނަމަވެސް އަދިވެސް ސަރުކާރު އޮފީސްތައް ހިންގަން އެކަށީގެންވާ ޖާގަ ނެތްކަމަށް މެންބަރު ވިދާޅުވިއެވެ.
ދުރާލާ ރޭވިގެން ސަރުކާރުގެ އޮފީސްތައް ހިންގަން އިމާރާތްތައް ހެދިފައި ނެތްކަމަކީ ކަންބޮޑުވާންޖެހޭކަމެއް ކަމަށްވެސް މަވޯޓާ ވިދާޅުވިއެވެ.
ބެލެވޭ ގޮތުގައި މިއަދު މި ގަރާރަށް ބަހުސްކޮށް ނިންމައި ވޯޓަށް އެހޭނެއެވެ.
ރައީސް ސާލިހުގެ ފެކްޝަނުގެ ނުރުހުން ގަރާރަށް:
މެންބަރު މުއިއްޒު ހުށަހަޅުއްވާފައިވާ ގަރާރަށް ބަހުސް ކުރައްވަމުން ރައީސް ސާލިހު ފެކްޝަނަށް ނިސްބަތްވާ ގިނަ މެންބަރުން ވަނީ ފާޑުވިދާޅުވެފައެވެ.
މިގޮތުން މިއަދު ރައްޔިތުންގެ މަޖިލީހުގައި ބަހުސް ކުރައްވަމުން ހެންވޭރު ހުޅަނގު ދާއިރާގެ މެންބަރު ހުސެން ޝަހީމް (އަންދުން ހުސެން) ވިދާޅުވީ، މި ގަރާރަކީ ސަރުކާރަށް "ފާޑުކިޔައި ޖެއްސުން ކުރުމަށް" ހުށަހަޅާފައިވާ ގަރާރެއް ކަމަށެވެ. މިފަދަ އެތައް ގަރާރެއް ރައީސް ނަޝީދު ރިޔާސަތުގައި އިންވައިގެން ބަލައިގަނެ މަޖިލީހުގައި ބަހުސްކުރަން ހުޅުވަލާތީ ކަންބޮޑުވެ ވަޑައިގަންނަވާކަމަށެވެ.
މީގެ ކުރިން ހަނިމާދޫ ދާއިރާގެ މެންބަރު އަބްދުލް ގަފޫރު މި ގަރާރަށް ބަހުސް ކުރައްވަމުން ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، ވިލުފުށީ ދާއިރާގެ މެންބަރު ހަސަން އަފީފް ރިޔާސަތުގައި ތިއްބަވައިގެން ރައްޔިތުންގެ މަޖިލީހަކީ "ސަރުކާރަށް ފާޑުކިޔާ ޕްލެޓް ފޯމަކަށް" ވެފައިވާކަމަށެވެ.
މި ގަރާރު އަނބުރާ ގެންދިއުމަށް ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު އަށް ސަރުކާރުން ޕްރެޝަރު ކުރަމުން ގެންދާކަމަށް ވެސް ރައީސް ނަޝީދު ފެކްޝަނުގެ ބައެއް މެންބަރުން ވަނީ ތުހުމަތު ކުރައްވާފައެވެ.
މި ގަރާރާ ގުޅޭގޮތުން ސަރުކާރުން ވަކި އެއްޗެއް ރަސްމީކޮށް ނުބުނި ނަމަވެސް، އުމަރު ޒާހިރު ބިލްޑިން ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެފައިވަނީ ސަރުކާރުގެ އޮފީސްތައް އެޅުމަށް އިތުރު އިމާރާތެއް އެޅުމުގެ ޕްލޭން އެމަނިކުފާނު ގެންގުޅުއްވާކަމަށެވެ. އަދި އޮފީސްތައް ހިންގުމަށް ދިމާވެފައިވާ ޖާގައިގެ ދަތިކަން ހައްލުކޮށްދެއްވާނެކަމަށެވެ.
