ރައީސް ނަޝީދު މި ކަންބޮޑުވުން ފާޅުކުރެއްވީ ހެންވޭރު ހުޅަނގު ދާއިރާގެ މެންބަރު ހަސަން ލަޠީފް، މިނިސްޓަރު އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ މުހައްމަދު އަސްލަމްއާ ސުވާލުކުރެއްވުމަށްފަހު މެންބަރުންނާ ސުވާލުކުރައްވަން ފުރުސަތު ހުޅުވާލުމުގެ ކުރިންނެވެ.
މިގޮތުން ރައީސް ނަަޝީދު ވިދާޅުވީ، އަމީނީ މަގުގައި ތާރުއެޅުމަށްފަހު ކާނުތައް މަތިން ތާރުއަޅާފައިވާތީވެ ތާރުތައް ކޮނެކަނޑާއިގެން ނަގާކަމަށެވެ.
ކުޑަހުދަވޫ ދާއިރާގެ މެންބަރު އާމިރު ވަނީ ތާރު ކަނޑައިގެން ނަގާ މައްސަލައިގައި މިނިސްޓަރާ ސުވާލުވެސް ކުރައްވާފައެވެ.
މިނިިސްޓަރު އަސްލަމް ވިދާޅުވީ، "މަސައްކަތްތައް ކުރަން މަގު ކަނޑާ ނަގަން އެބަޖެހޭ" ކަން އޭނާއަށް ވެސް ފާހަގަވެލައްވާފައިވާކަމަށެވެ.
މިނިސްޓަރު އަސްލަމް މި ޖަވަބު ދެއްވުމުން ރައީސް ނަޝީދު ވަނީ އަނެއްކާވެސް އެމަނުކުފާނުގެ ކަންބޮޑުވުން ތަކުރާރު ކުރައްވާފައެވެ.
އަމީނީ މަގު ޒަމާނީ ފެންވަރަށް ތަރައްގީ ކުރުމުގެ މަސައްކަތުގެ ތެރެއިން އާރުޑީސީން ފެށި މަސައްކަތުގެ ތާރުއެޅުން ސަބްކޮންޓްރެކްޓް އުސޫލުން ވަނީ އެމްޓީސީސީއާއި ހަވާލުކޮށްފައެވެ.
ދިހަ މަސްދުވަހުގެ ތެރޭގައި މަސައްކަތް ނިންމުމަށް 84.4 މިލިއަން ރުފިޔާއަށް އަމީނީމަގު ހެދުމުގެ މަސައްކަތް އާރުޑީސީއާއި ހަވާލުކޮށްފައިވަނީ 3 ޖުލައި 2022 ގައެވެ.
