ވެމްކޯގެ ހަތްވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން ޝައުނާ ވިދާޅުވީ ރާއްޖޭގެ އެންމެ އުތުރާއި އެންމެ ދެކުނުގައި ގާއިމުކުރެވޭ ސަރަހައްދީ ކުނި މެނޭޖުކުރާ މަރުކަޒުތައް ހިންގާ ބެލެހެއްޓުމުގެ ޒިންމާ އަދާކުރާ ބަޔަކީ ވެމްކޯ ކަމަށެވެ.
ޝައުނާ ވިދާޅުވެފައިވަނީ ގްރޭޓާ މާލެ ވޭސްޓު-ޓު-އެނަޖީ ޕްރޮޖެކްޓުގެ މަސައްކަތް މެދުކެނޑުމެއްނެތި ކުރިއަށް ދާ ކަމަށާއި އެ ކަމަށް ބޭނުންވާ ކުނި ތިލަފުށްޓަށް ގެނައުމާއި ކުނި ވަކިކުރުމާއި ޝްރެޑްކުރުމުގެ އިތުރުން ބޭލްކުރުމުގެ މަސައްކަތްތައް ކުރެވެމުންދާ ކަމަށެވެ. މި ޕްރޮޖެކްޓުގެ ތެރެއިން ވެމްކޯއިން ކުރަމުންދާ މަސައްކަތްތަކަކީ ބައިނަލްއަގުވާމީ މިންގަނޑުތަކަށް ފެތޭ މަސައްކަތްތަކަކަށް ހެދުމަށް ފަންނީ ކޮންސަލްޓެންޓުންގެ އެހީތެރިކަން ފޯރުކޮށްދޭނެ ކަމަށް ޝައުނާ ވިދާޅުވިއެވެ.
ޝައުނާ ވިދާޅުވި ގޮތުގައި ކުނި މެނޭޖުކުރުމުގެ ޒަމާނީ އާލާތްތަކާ އެކު ފައްކާކުރެވެމުން އަންނަ ވެމްކޯ ވާނީ ކުނި މެނޭޖުކުރުމަށް އިންގިލާބީ ބަދަލެއް ގެންނާނެ ކުންފުންޏަކަށް ކަމުގައެވެ.
ރަށްރަށުގައި ފުނިޖެހިފައިވާ ކުނިތައް ނަގައި، ކުނި މެނޭޖުކުރުމުގައި ދިމާވެފައިވާ ގޮންޖެހުންތައް ފިލުވައިދޭ ބަޔަކީ ވެމްކޯ ކަމަށް ޝައުނާ ވިދާޅުވިއެވެ.
ޝައުނާ ވިދާޅުވި ގޮތުގައި އެ ކުންފުންޏަކީ ރައްކާތެރި ގޮތުގައި ކުނި މެނޭޖުކުރުމުގެ ހުރިހާ މަސައްކަތެއް ކުރަމުން އަންނަ ފަންނީ ގޮތުންނާއި މާލީ ގޮތުން ގާބިލް ކުންފުންޏަކަށް ހެދުމުގެ މަސައްކަތް ސަރުކާރުން ކުރަމުން އަންނަ ކަމުގައެވެ.
