ބްލަޑް ބޭންކެއް ގާއިމުކުރުމަށްޓަކައި ބޭނުންވާނެ މެޝިނަރީސް ސަޕްލައި ކޮށްދޭނެ ފަރާތެއް ހޯދުމަށް އެ ހޮސްޕިޓަލުން މިހާރުވަނީ އިއުލާން ކޮށްފައެވެ.
23 ފެބުރުވަރީ 2023 ވީ ބުރާސްފަތި ދުވަހު ކޮށްފައިވާ އެ އިއުލާނުގައި ކޭއާރުއެޗުން ހާމަކޮށްފައިވާ ގޮތުގައި، މި ބްލަޑް ބޭންކަކީ، އެ ހޮސްޕިޓަލުން ހިދުމަތް ހޯދާ ފަރާތްތަކުން ލޭ ހޯދަންޖެހޭ ހާލަތްތަކުގައި ފަސޭހަ ކަމާއެކު ލޭ ލިބޭނެގޮތް ކަށަވަރުކޮށް، ވީހާވެސް އަވަހަށް ބްލަޑް ބޭންކުގެ ހިދުމަތް ފެށުމަށް ބޭނުންވާނެ ބައެއް މެޑިކަލް މެޝިނަރީސް އާއި އިކްއިޕްމަންޓްސް ސަޕްލައި ކޮށްދޭނެ ފަރާތެއް ހޯދުމަށް ކުރެވުނު އިއުލާނެއް ކަމަށެވެ.
މިތަކެތި ސަޕްލައި ކޮށްދިނުމަށް ޝައުގުވެރިވާ ފަރާތްތަކުން، 2023 މާރިޗު 6 ވާ ހޯމަ ދުވަހުގެ މެންދުރު 13:00 ގެ ނިޔަލަށް ގެޒެޓް ކުރެވިފައިވާ ރަޖިސްޓްރޭޝަން ޝީޓު ފުރިހަމަކޮށް އީމެއިލް ކުރެއްވުމަށް އެދިފައިވެއެވެ. ބީލަން ހުށަހެޅުމުގެ ތާރީޚެއްގެ ގޮތުގައި ކަނޑައަޅުއްވާފައިވަނީ 2023 މާރިޗު 9 ވަނަ ދުވަހުގެ 11:00 އެވެ.
ކޭއާރުއެޗް އަކީ، އުތުރުގެ ތިން އަތޮޅު (ހއ، ހދ، ށ) ހިމެނޭހެން ގިނަ ރައްޔިތުންތަކަކަށް ބޭސްފަރުވާގެ ހިދުމަތް ފޯރުކޮށް ދެމުންދާ ހޮސްޕިޓަލެކެވެ. ބްލަޑް ބޭންކުގެ ހިދުމަތް ގާއިމް ކުރެވިގެން ދިޔުމަކީ ކޭއާރުއެޗުން ހިދުމަތް ހޯދާ ހުރިހާ ފަރާތްތަކަށް ލިބިގެންދާނެ ބޮޑު ތަސައްލީއަކަށް ވެގެންދާނެއެވެ.
