ސުޕަރ ލީގުގެ ޕްލޭ އޮފްގައި ރޭ ބެންގަލޫރު އެފްސީއާ ކެރެލާ ބްލާސްޓަރ ކުޅުނު މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ ޓީމަކަށް ލަނޑެއް ނުޖެހެއެވެ.
ނަތީޖާ ނެރުމަށްޓަކައި އިތުރު ވަގުތު ކުޅެމުން ދަނިކޮށް ބެންގަލޫރަށް ލިބުނު ހިލޭ ޖެހުމެއް، ކެޕްޓަން ސުނިލް ޗެތްރީ އަވަސް އަވަހަށް ފޮނުވާލިއިރު ކެރެލާ ކުޅުންތެރިން ތިބީ ތައްޔާރު ނުވެއެވެ. ކުޅުންތެރިން ތައްޔާރުނުވެ ތިއްބާ ޗެތްރީ ފޮނުވާލި ބޯޅަ ގޮސް ގޯލްތެރެއަށް ވަނުމާއެކު ކެރެލާ ކުޅުންތެރިން އެކަމާ ޝަކުވާކޮށް އެންމެ ފަހުން މެޗު ނުކުޅެ ފޭބީއެވެ.
ރެފްރީ މެޗު ނިންމާލީ އެ ކުޅުންތެރިން އަލުން އެނބުރި ދަނޑަށް ނައުމުންނެވެ. މެޗަށް ފަހު ވާހަކަ ދައްކަމުން ޗެތްރީ ބުނީ ކެރެލާ ކުޅުންތެރިންގެ ހިތްހަމަ ނުޖެހުން އޭނާއަށް ވިސްނޭ ކަމަށާއި އެހެންނަމަވެސް މެޗު ނުކުޅެ ދިޔުން ގަބޫލު ނުކުރެވޭނެ ކަމަށެވެ.
ޕްލޭ އޮފް މެޗުގައި ޗެރްރީގެ ލަނޑާއެކު ކެރެލާ ކުޅުން ދޫކޮށްލައި ދިޔުމުން އެ ޓީމަށް ބޮޑު އަދަބެއް އަންނާނެ ކަމަށް ބެލެވެއެވެ.
ކެރެލާ އަތުން ބެންގަލޫރު މޮޅުވުމުން، ސެމީ ފައިނަލުގައި އެ ޓީމުން ވާދަކުރަން ޖެހޭނީ މުމްބާއީ އެފްސީއާއެވެ. އެ މެޗު އޮންނާނީ އަންނަ އަންގާރަ ދުވަހުއެވެ.
