ވީޑިއޯ ހާމަކޮށް ފުލުހުން ހޯދަން އިއުލާންކޮށްފައިވަނީ އަންހެނަކާއި، ދެ ފިރިހެނުން ނެވެ. މީގެތެރެއިން އަންހެނަކާއި ފިރިހެނަކު މަގުމަތީން އެކީގައި ހިނގާފައިދާ މަންޒަރު ވީޑިއޯއިން ފެނެއެވެ.
ވީޑިއޯ އާންމުކޮށް ފުލުހުން މިއަދު އެމީހުން ހޯދަން އިއުލާންކޮށް ބުނެފައިވަނީ، ވީޑިއޯއިން ފެންނަ ތިން މީހުންނަކީ އަޅިވިލާ މަގުގައި ފްރީޑަމް މޯބައިލް ސާވިސް އިން ހިދުމަތް ހޯދި ތިން މީހުން ކަމަށެވެ. އެތަނުން ސާވިސްކުރި ފޯނަކަށް، އަގު އަދާކުރުމުގެ ގޮތުން ސައްހަ ނޫން ޓްރާންސްފާ ސްލިޕެއް އެ މީހުން ފޮނުވާފައިވާކަމަށް ފުލުހުން ބުންޏެވެ.
މި މީހުން ހޯދަން މިއަދު ފުލުހުން އިއުލާންކުރީ އިކޮނޮމިކް ކްރައިމް ޑިޕާޓްމަންޓުން ކުރަމުންދާ ތަހުގީގަށް ހޯދަން ބޭނުންވެ، ފުލުހުން މިހާތަނަށް ކުރި މަސައްކަތުން ކޮން ބައެއްކަން ދެނެގަނެވިފައިނުވާތީ އެވެ. އަދި އެމީހުންނަކީ ކޮން ބައެއްކަން ދެނެގަނެވިފައިނުވާތީ މިހާތަނަށް އެމީހުން ހޯދިފައި ނުވާކަމަށް ފުލުހުން ބުންޏެވެ.
އެހެންވެ، ވީޑިއޯއިން ފެންނަ އެ މީހުންނާ ބެހޭ އެއްވެސް މައުލޫމާތެއް ލިބިފައިވާނަމަ އިކޮނޮމިކް ކްރައިމް ޑިޕާޓްމަންޓްގެ ނަންބަރު 9790048 އަށް ގުޅުއްވައި މައުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.
