އެމްއޭސީއެލުން އެގޮތަށް އަންގާފައިވަނީ އެ ކުންފުނީގެ ފަރާތުން މިއަދު ނެރުނު އެންގުމެއްގައެވެ. އެ އެންގުމުގައި ވަނީ ހުޅުލޭގެ އިރުއުތުރު ފަރާތުގައި ހުޅުލެ އާއި ހުޅުމާލޭގެ ފަޅު ވަކި ކުރުމަށްޓަކައި، ވޯޓަ ފެންސް ޖެހުމަށް ހަރުކޮށްފައިވާ އޮރެންޖު ބޮއި ސަރަހައްދުގައި ޕައިލިން މަސައްކަތް ކުރުމަށް އެ ސަރަހައްދުގައި އަޅާފައިވާ ކަނޑު އުޅަނދުފަހަރުތައް މި މަހުގެ ނުވަވަނަ ދުވަހުގެ ކުރިން ނެގުމަށް އަންގާ ކަމަށެވެ.
އޮރެންޖު ބޮއި އިން ފެށިގެން އުތުރަށް (ހުޅުމާލެ ފަޅިއަށް) 20 މީޓަރު ނުވަތަ 65 ފޫޓުގެ ދުރުމިނެއް ކަނޑު އުޅަނދުފަހަރުގެ ރައްކާތެރިކަމަށް ޓަކައި ބެހެއްޓުމަށް އެމްއޭސީއެލުން އެދެއެވެ. އެމްއޭސީއެލުން ބުނި ގޮތުގައި އެ ސަރަހައްދަށް ވަންނަ އެއްވެސް ކަނޑު އުޅަނދުފަހަރަކަށް ލިބޭ ގެއްލުމުގެ ޒިންމާ އެ ކުންފުނިން ނުނަގާނެ ކަމުގައެވެ.
އެމްއޭސީއެލުން ބުނެފައިވަނީ މި މަހުގެ 10 ވަނަ ދުވަހުން ފެށިގެން އެ ސަރަހައްދުގައި ބަހައްޓާ ކަނޑު އުޅަނދުފަހަރު ދިވެހި ފުލުހުންގެ ހިދުމަތުން ނަގަމުންދާނެ ކަމަށެވެ.
