އައިވަރީ ކޯސްޓްގެ އެއްވަނަ ޑިވިޝަންގެ މެޗެއްގެ ތެރެއިން މަރުވީ ރޭސިން ޑި އަބިޖާން ކިޔާ ކްލަބަކަށް ކުޅޭ އުމުރުން އެންމެ 21 އަހަރުގެ ޑިފެންޑަރެކެވެ.
މެޗު ތެރެއިން އޭނާ ވެއްޓުމާއެކު ވަގުތުން އޭނާ ހޮސްޕިޓަލަށް ގެންދިޔައެވެ. ބައެއް ރިޕޯޓްތައް ބުނާ ގޮތުގައި ކުޅުންތެރިޔާ މަރުވީ ހޮސްޕިޓަލަށް ގެންދިޔަ މަގުމަތީގައި އެމްބިއުލާންސްގައެވެ. އެހެން ބައެއް ރިޕޯޓްތައް ބުނާ ގޮތުގައި ދަނޑުމައްޗަށް ކުޅުންތެރިޔާ ވެއްޓުނީ މަރުވެގެންނެވެ.
މުސްތަފާ ސީލިއާ ކިޔާ މި ކުޅުންތެރިޔާއަކީ މިދިޔަ އަހަރުގެ ސެޕްޓެމްބަރު މަހު އެ ކްލަބާ ގުޅުނު ކުޅުންތެރިއެކެވެ. އިތުބާރު ޑިފެންޑަރެއް ކަމަށް އެ ކްލަބުން ދެކޭ މި ކުޅުންތެރިޔާގެ ސިއްހީ މައްސަލައެއް ކުރިން ފާހަގަ ވެފައިނުވާ ކަމަށްވެސް ރިޕޯޓްތައް ބުނެއެވެ.
ދަނޑުމަތީގައި ކުޅުންތެރިން މަރުވުމުގެ ހާދިސާތައް މީގެ ކުރިންވެސް ހިނގާފައި އެބަހުއްޓެވެ.
