ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ ޓެރަރިޒަމް މަނާ ކުރުމުގެ ގާނޫނުގެ ދަށުން ހަ މީހެއްގެ މައްޗަށް ދައުވާކޮށް، ކްރިމިނަލް ކޯޓަށް ފޮނުވާފައިވާ ކަމަށެވެ.
އެމީހުންނާ ދެކޮޅަށް ކޮށްފައިވަނީ ހރުކަށި ފިކުރު ގަބޫލު ކުރުމާއި ސީރިއާގައި ހިނގަމުންދާ ދާހިލީ ހަނގުރާމާގައި ބައިވެރިވާން ދިވެހިން ފޮނުވަން މަސައްކަތް ކުރި ކަމުގެ ތުހުމަތުގަ އެވެ.
ޕީޖީ އޮފީހުން ބުނީއެ ހަ މީހުންނަކީ މަޑުއްވަރީ ގުލްއަލާގޭ އިބްރާހިިމް ޖިހާދާއި އެ ރަށު މީރާ، ހަސަން ރާޒީ އާއި މަޑުއްވަރީ މީޒާން، ހަސަން ސިޔާދުގެ އިތުރުން އެގޭ އާދަމް ސުހައިލް އާއި ނ. މަނަދޫ ގަހާ، އިބްރާހިމް ޝިބުނީގެ މައްޗަށް ޓެރަރިސްޓް ޖަމާއަތަކަށް ތާއީދު ކުރުމުގެ ދައުވާ ކޮށްފައިވާ ކަމަށެވެ.
އަދި ޖިހާދާއި ރާޒީގެ މައްޗަށް ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާ ފަދަ ލިޔުމެއް ގެންގުޅުމުގެ ދައުވާ ކުރުމުގެ އިތުރުން ރާޒީގެ މައްޗަށް އޮރިޔާން ކާޑު ގެންގުޅުމުގެ ދައުވާ އާއި މަޑުއްވަރީ ސައީދާ މަންޒިލް، މުހައްމަދު މައުޖޫދުގެ މައްޗަށް ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާ ފޮޓޯއެއް ގެންގުޅުމުގެ ދައުވާ ވެސް ވަނީ އުފުލާފަ އެވެ.
މަޑުއްވަރީގައި ދީނީ ހަރުކަށި ފިކުރަށް ތާއީދު ކުރާ ބަޔަކު އުޅޭ ކަމުގެ މައުލޫމާތު ލިބުމާ ގުޅިގެން ފުލުހުން ވަނީ އެ ރަށުގައި ބޮޑު އޮޕަރޭޝަނެއް ހިންގާފަ އެވެ. އެގޮތުން ބައެއް ގެތައް ފާސްކޮށް، މީހުން ހައްޔަރު ކުރި އެވެ.
އެ ރަށުގެ މައްސަލަ ފެންމަތިވީ ހަރުކަށި ފިކުރަށް އުޅޭ ބަޔެއްގެ މެދުގައި ހިނގި މަރާމާރީއެއްގެ ތެރެއިން، އެތަނުން އެކަކު 13 އަހަރުގެ ކުޑަކުއްޖަކާ ކައިވެނިކޮށް، އެ ކުއްޖާއަށް ދަރިއަކު ލިބުނު ކަމުގެ ހަބަރު ފެތުރުމުންނެވެ.
