ކުޅުނު ހުރިހާ މެޗަކުން މޮޅުވެގެން އިސްކަންދަރު ޗެމްޕިއަންކަން ހޯދިއިރު، ފައިނަލް މެޗުގައި އެ ޓީމުންވަނީ 1-7 ން ކަލާފާނު ބަލިކޮށްފައެވެ. ފައިނަލުގައި ކަލާފާނަށް ލިބުނު ޕެނަލްޓީއަކުން ޖެހި ލަނޑަކީ އިސްކަންދަރުކޮޅަށް މުބާރާތުގައި ވަތް ހަމަ އެކަނި ލަނޑުވެސްމެއެވެ.
ފައިނަލުގައި އިސްކަންދަރުން ޖެހި ހަތް ގޯލުގެ ތެރެއިން ފަސް ގޯލު ޖެހީ މެޗުގެ މޮޅު ކުޅުންތެރިޔާ، މުހައްމަދު އިލާން އިމްރާން އެވެ. އަނެއް ދެ ގޯލު ޖެހީ މުހައްމަދު ލާމިހު އިމްތިޔާޒް އާއި ކާއިން އަބްދުލް ފާއިޒް އެވެ.
ކަލާފާނުގެ ހަމައެކަނި ލަނޑު ޖެހީ ޕެނަލްޓީ އަކުން، އަހުމަދު އަފްނާން އަލީ އެވެ.
އިސްކަންދަރުންވަނީ މުބާރާތުގައި ކުޅުނު ހަ މެޗުން މޮޅުވިއިރު، 86 ގޯލު ޖަހައިފަ އެވެ. ބައިކޮޅަށް ވަނީ އެންމެ ގޯލެކެވެ. މުބާރާތުގައި އެންމެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހީ އިސްކަންދަރު ޓީމުގެ އިލާން އެވެ. އޭނާ ވަނީ 38 ގޯލު ޖަހައިފަ އެވެ. މުބާރާތުގެ ފެއާޕްލޭ ޓީމަކަށް ހޮވިފައިވަނީ އިމާދުއްދީން ސްކޫލް އެވެ.
