ފަރެސްމާތޮޑާގެ 22 އަހަރުވީ އިންޖީނުގެ ނިއްވާލައި، އަލަށް އިމާރާތް ކުރެވުނު އިންޖީނުގެ ހުޅުވައިދެއްވީ ޕްލޭނިން މިނިސްޓަރު މުހައްމަދު އަސްލަމާއި ފެނަކަ ކޯޕަރޭޝަން ލިމިޓެޑް (ފެނަކަ) ގެ މެނޭޖިން ޑިރެކްޓަރު އަހުމަދު ސައީދު މުހައްމަދެވެ.
ފެނަކައިން ބުނީ އެ ރަށުގައި ހިންގަމުން އައި ބާ އިންޖީނުގެއިން ކަރަންޓުގެ ހިދުމަތް ދެމުން އައީ 250، 400 އަދި 600 ކިލޯވޮޓްގެ ޖަނަރޭޓަރު ސެޓުތަކުން ކަމަށްވީ ނަމަވެސް އާ އިންޖީނުގެއިން އެ ހިދުމަތް ފޯރުކޮށްދޭނީ 400، 600 އަދި 800 ކިލޯވޮޓްގެ ޖަނަރޭޓަރު ސެޓުތަކުން ކަމަށެވެ. އެހެންކަމުން ރަށުގެ އާ އިންޖީނުގެ އާއެކު، ކަރަންޓު ކެޕޭސިޓީ ވަނީ 1،250 ކިލޯވޮޓުން 1،800 ކިލޯވޮޓަށް އިތުރުވެގެން ގޮސްފައެވެ.
ފަރެސްމާތޮޑާގެ މަރުކަޒީ އިންޖީނުގެއިން ރަށުގެ އިތުރުން އެއާޕޯޓަށް ކަރަންޓުގެ ހިދުމަތް ފޯރުކޮށްދޭން ފަށާފައިވާ ކަމަށް ވެސް ފެނަކައިން ބުނެއެވެ.
ފެނަކައިން ބުނެފައިވާ ގޮތުގައި ރަށްރަށުގައި އަލަށް އިމާރާތް ކުރާ އިންޖީނުގެތަކުގައި ޒަމާނީ ފެންވަރުގެ އޮފީސް އިމާރާތަކާއި ރައްކާތެރިކަމާ އެކު ތެޔޮ ރައްކާކުރެވޭނެ ތަންތަން ގާއިމުކުރުމުގެ އިތުރުން ރައްޔިތުންނަށް ލިބޭ ގެއްލުން ކުޑަކުރުމުގެ ގޮތުން އިންޖީނުގެތަކުން ދުން ބޭރުކުރުމަށް ޗިމްނީތަކެއް ހަދަމުންދާ ކަމުގައެވެ.
އާ އިންޖީނުގެތަކާ އެކު ރަށްރަށުގެ ކަރަންޓް ނެޓްވޯކް އަޕްގްރޭޑް ކުރާ ކަމަށް ވެސް ފެނަކައިން ބުނެއެވެ. ފެނަކައިން ބުނީ މޯލްޑިވްސް އެނަޖީ އޮތޯރިޓީގެ ގަވައިދުތަކާ އެއްގޮތްވާ ގޮތުގެ މަތިން 70 ޑެސިބެލްއަށް ވުރެ މަތިނުވާނެހެން، ސައުންޑް އެޓެނުއޭޓަރު ފަދަ ޒަމާނީ ވަސީލަތްތަކުގެ އެހީގައި އިންޖީނުގެއިން އުފައްދާ އަޑު މަޑުވެގެންދާނެ ކަމަށެވެ.
