އެބިއުރޯއިން ހާމަކޮށްފައިވާ ގޮތުގައި 30 މާރިޗް ގައި އާއްމުކުރަން ހަމަޖެހިފައިވަނީ ބޯހިމެނުން 2022 ގެ ފުރަތަމަ ރިލީސް ކަމަށްވުމާއިއެކު، މި ތާރީޚުގައި އާއްމުކުރެވިގެން ދާނީ އަސާސީ މައުލޫމާތެވެ. އޭގެ ތެރޭގައި ހިމެނެނީ:
- ޖުމްލަ އާބާދީ: ޖިންސާއި އުމުރުފުރާ ވަކިން ޖުމްލަ އާބާދީ. ދިވެހިން އަދި ބިދޭސީންވެސް ހިމަނައިގެން (އިދާރީ ރަށްރަށު ފެންވަރުގައި)
- ޖުމްލަ ގޭބިސީ: އެވްރެޖްކޮށް ކޮންމެ ގޭބިސީއެެއްގައި މީހުން އުޅޭ އަދަދާއި ޖުމްލަ ގޭބިސީގެ އަދަދު (އިދާރީ ރަށްރަށު ފެންވަރުގައި)
- ބޯހިމެނުގެ ލިސްޓް އިން ނެގުނު އަދަދު: މީހުން ދިރިއުޅޭ އިމާރާތްކާއި، ގެ، ފްލެޓް، އެޕާޓްމަންޓް އަދި ލޭބަރ ކުއާޓަރގެ އިތުރުން މަސައްކަތް ހިނގާ ތަންތަނުގެ އަދަދު (އިދާރީ ރަށްރަށު ފެންވަރުގައި)
އެބިއުރޯއިން އިތުރަށް ހާމަކޮށްފައިވާ ގޮތުގައި، މަސައްކަތު އާބާދީ އާއި މަސައްކަތްކުރާ އިންޑަސްޓްރީ އާއި އޮކިއުޕޭޝަން ގެ މައުލޫމާތުތައް ވެލިޑޭޓް ކުރުމުގެ މަސައްކަތް މިވަގުތުވެސް ކުރިއަށްދާތީވެ، އެމައުލޫމާތުތައް އެހެންތާރީޚެއްގައި އާއްމުކުރެވޭނެއެވެ.
އަދި އިތުރު މައުލޫމާތުތައް އާއްމުކުރާނެ ތާރީޚުތައް ފަހުން އިއުލާނުކުރެވޭނެ ވާހަކައިގެ އިތުރުން އެ ބިއުރޯގެ އަމާޒަކީ ބޯހިމެނުމުގެ ތަފާސްހިސާބު ވީހާވެސް ފުޅާދާއިރާއެއްގައި ހާމަކޮށް، މިހާމަކުރެވޭ ތަފާސްހިސާބުގެ އަލީގައި އެކިކަންކަން ކުރުމަށް އެހީތެރިވެދިނުންކަމަށްވެސް އެބިއުރޯއިން މީޑިއާތަކަށްފޮނުވި މެސެޖްގައި ހިމަނާފައި ވެއެވެ.
ބޯހިމެނުން 2022 ކުރިއަށް ގެންގޮސްފައިވަނީ 2022 ވަނައަހަރުގެ ސެޕްޓެމްބަރ މަހުގެ 13 އިން 25 އަށެވެ.
