މިނިސްޓަރ މާރިޔާ ކުރެއްވި ޓްވީޓް އެއްގައި ވިދާޅުވީ، އައިޖީއެމްއެޗްގެ އޮޕަރޭޝަނެއް ގޯސްކޮށް ދިއުމުން އެއްވެސް މީހަކަށް ހެތްލް މިނިސްޓަރު ގޯސް ނުވެ، ފުލުހުން ކުރާކަމަކުން ހޯމް މިނިސްޓަރު އެއްވެސް މީހަކަށް ގޯސް ނުވާ ކަމަށެވެ. ނަމަވެސް އެމްއެންޑީއެފްގެ އޮޕަރޭޝަން ލެވަލްގައި ކަމެއް ގޯސް ވުމުން ޑިފެންސް މިނިސްޓަރު ގޯސްވަނީ އަންހެނަކަށް ވުމުން ކަމަށެވެ.
މާރިޔާ މިހެން ވިދާޅުވިއިރު ރައީސްގެ މޮޓޮކޭޑް ކުރިމައްޗަށް، މުޒާހިރާ ކުރަމުންދިޔަ ބަޔަކު އަރާ ހުއްޓުވައި ހެދުމުގެ ސަބަބުން، އެކަމުގެ ޒިންމާ މިނިސްޓަރ މާރިޔާ ނަންގަވަންޖެހޭނެކަމަށާއި، އަދި ޑިފެންސް މިނިސްޓަރ ކަމުން މާރިޔާ އިސްތިއުފާ ދެއްވުމަށް ބައެއް ފަރާތްތަކުން ވަނީ ގޮވާލަފައެވެ.
މިނިސްޓަރ މާރިޔާ، އެކަމަނާ އަށް ވަކިން ދިމާކުރާމަކަށް ސިފަވާގޮތަށް ވާހަކަދެއްވިޔަސް، ދިވެހި ދިފާއީ ބާރުގެ ގިނަ މައްސަލަތަކެއް ތަކުރާރުކޮށް ފެންނަމުން އެބަދެއެވެ. މީގެ ތެރޭގައި، ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއާއި، ރައީސުލްޖުމްހޫރިއްޔާގެ ސެކިއުރިީ އެތަކެއްފަހަރެެއްގެ މަތިން ބްރީޗްވެ، އެއްމެފަހުން އެމަނިކުފާނުގެ މޮޓޮކޭޑް ކުރިމައްޗަށް ބަޔަކު އަރާ، ހުއްޓުވާ ހެދުން ފާހަގަކޮށްލެވެއެވެ.
އަދި ހަމަ އެހެންމެ، އެހެނިހެން މިނިސްޓްރީ ތަކުގެ ދަށުން ހިނގާފައިވާ ބޮޑެތި ހާދިސާ ތަކައި ގުޅުވައި، އެކި އެކި ވަޒީރުން ޒިންމާކުރުވުމުގެ ވާހަކަ އަބަދުވެސް އެކި ފަރާތްތަކުން ފާހަގަކުރައްވައެވެ. އަދި މިކަމާއި ގުޅިގެން ބައެއް ވަޒީރުން މަގާމުން އިސްތިއުފާ ދެއްވާފައިވާކަންވެސް ފާހަގަކޮށްލެވެއެވެ. މީގެ ތެރޭގައި، ކުރީގެ ޖެންޑަރ މިނިސްޓަރ ޝިދާތާ އާއި، ކުރީގެ ހެލްތް މިނިސްޓަރ އަމީން ފާހަގަކޮށްލެވެއެވެ.
މަރިޔާ މިހެން ވިދާޅުވި ނަމަވެސް ހޮސްޕިޓަލްތަކުގައި ހިނގާ ކަންކަމާ ގުޅިގެން ހެލްތު މިނިސްޓަރަށް އެތައް ފަހަރަކު ފާޑުކިއުން އަމަޒުވެ އިސްތިއުފާއަށް ގޮވާފައި ވެއެވެ. އަދި ފުލުހުންގެ އޮޕަރޭޝަންތަކާ ގުޅިިގެން ހޯމް މިނިސްޓަރުގެ އިސްތިއުފާއަށް ގޮވުމަކީ އާއްމު ކަމެކެވެ.
ރައީސްގެ ސެކިއުރިޓީ ބްރީޗްވި މައްސަލަ، އެމްއެންޑީއެފުން ބަލަމުން އަންނަ އިރު އެމައްސަލާގައި ފުލުހުންވެސް އަންނަނީ ތަހުގީގެއް ކުރަމުންނެވެ. އަދި ރައްޔިތުންގެ މަޖިލީހުގެ ސަލަމަތީ ހިދުމަތްތަކަ ބެހޭ ކޮމެޓީންވެސް މައްސަލަ އަންނަނީ ބަލަމުންނެވެ.
ރައީސްގެ ސެކިއުރިޓި ފެއިލްވުމުގެ މައްސަލާގައި ސަސްޕެންޑް ކޮށްފައިވާ ކޮމާންޑަރު ކާނަލް އަބްދުﷲ އިބްރާހިމް: ފޮޓޯ މިހާރު
އެމްއެންޑީއެފުން މައްސަލަ ބަލަމުން ގެންދާއިރު ރައީސްގެ ސެކިއުރިޓި ކޮމާންޑަރު ކާނަލް އަބްދުﷲ އިބްރާހިމް ވަނީ މިހާރު ސަސްޕެންޑްކޮށްފައެވެ. އަދި ރައީސްގެ ސެކިއުރިޓީ ކޮމާންޑަރުކަމަށް ވަގުތީގޮތުން މޭޖަ އިބްރާހިމް ހަލީމް އައްޔަންކޮށްފައިވާ ކަމަށެވެ.
