ހުޅުމާލޭގައި އިޝްތިހާރުކުރެވޭނެ އުސޫލަށް ބަދަލު ގެނެސްފައިވާ ކަން ހާމަކޮށް އެޗްޑީސީން ކުރި އިއުލާނުގައި ބުނެފައިވަނީ އަންނަ އެޕްރީލު މަހުގެ ފުރަތަމަ ދުވަހުން ފެށިގެން ހުޅުމާލޭގައި ކަރުދާހާއި ފޮތި ބޭނުންކޮށްގެން އިޝްތިހާރު ނުކުރެވޭނެ ކަމަށެވެ. އެ އިއުލާނާ އެކު، މި ވަގުތު ހުޅުމާލޭގެ އެކި ސަރަހައްދުތަކުގައި ކަރުދާހާއި ފޮތި ބޭނުންކޮށްގެން ހަރުކޮށްފައިވާ އިޝްތިހާރުތައް އޭޕްރީލްމަހުގެ އެއްވަނަ ދުވަހުގެ ކުރިން ނެގުމަށް އެޗްޑީސީން ވަނީ އަންގާފައެވެ.
އެޗްޑީސީން ބުނި ގޮތުގައި ކަރުދާހާއި ފޮތި ބޭނުންކޮށްގެން އިޝްތިހާރުކުރުން ނިމުމަކަށް ގެނައި ނަމަވެސް ހުޅުމާލޭގައި އިޝްތިހާރު ކުރެވޭނެ ގޮތްތައް ފަހިވެފައިވާ ކަމުގައެވެ. އެގޮތުން އެ ކޯޕަރޭޝަނުގެ އާބަންހައިޕް މެދުވެރިކޮށް ހުޅުމާލޭގެ އެކި ސަރަހައްދުތަކުގައި ގާއިމުކޮށްފައިވާ ޑިޖިޓަލް ބޯޑުތަކުގައި އިޝްތިހާރު ކުރެވޭނެ އިންތިޒާމު ހަމަޖައްސާފައިވާ ކަމަށް އެޗްޑީސީން ބުނެއެވެ.
ސްމާޓް ސިޓީއެއްގެ ގޮތުގައި ތަރައްގީ ކުރާ ހުޅުމާލެއަކީ ދިރިއުޅެން ފަހި، ސާފުތާހިރު ތަނަކަށް ހެދުމަށް އެޗްޑީސީން އަންނަނީ ގިނަ މަސައްކަތްތަކެއް ކުރަމުންނެވެ.
