އެޗްޑީސީން ބުނީ ޕާކު ހުޅުވުމަށް ރޭ ބޭއްވި ރަސްމިއްޔާތުގައި އެ ތަން ހުޅުވައިދެއްވާފައިވަނީ ހުޅުމާލެ ދާއިރާގެ މެންބަރު އަލީ ނިޔާޒު ކަމަށެވެ. ޕާކު ހުޅުވުމުގެ ރަސްމިއްޔާތުގައި އެ ކޯޕަރޭޝަނުގެ އެމްޑީ އަހުމަދު އާތިފުގެ އިތުރުން އެހެން އިސްވެރިން ބައިވެރިވެވަޑައިގަތް ކަމަށް އެޗްޑީސީން ބުނެއެވެ.
އެޗްޑީސީން ބުނެފައިވަނީ ޕާކު ހުޅުވުމަށް ބޭއްވި ރަސްމިއްޔާތާ އެކު، އެ ސަރަހައްދުގެ ރައްޔިތުންނަށް ތަރާވީހެއް ބާއްވާފައިވާ ކަމަށެެވެ.
ހުޅުމާލޭގެ ރައްޔިތުންނަށް ހިތްގައިމު މާހައުލެއް ހޯދައިދިނުމުގެ ގޮތުން އެޗްޑީސީން އެ ޕާކު ހަދާފައި ވަނީ 704 ފްލެޓު ސަރަހައްދުގައި ހުޅުމާލެ ހޮސްޕިޓަލް ފަހަތުގައެވެ.
ޕާކުގެ އެންމެ ހާއްސަ ކަމަކީ ކާބަފައިންގެ ޒަމާން ތަޖުރިބާކޮށްލެވޭ ގޮތަށް ހަދާފައިވާ ހޮޅުއަށި - ފޮޓޯ:އެޗްޑީސީ
އެޗްޑީސީން ބުނި ގޮތުގައި ދިވެހި ތާރީހު ދައްކުވައިދޭ ތަފާތު ކުރެހުންތަކާ އެކު ހަދާފައިވާ ޕާކުގެ އެންމެ ހާއްސަ ކަމަކީ ކާބަފައިންގެ ޒަމާން ތަޖުރިބާކޮށްލެވޭ ގޮތަށް ހަދާފައިވާ ހޮޅުއަށި ކަމުގައެވެ.
އޭގެ އިތުރަށް ކުޑަކުދިން ކުޅެން ހާއްސަކޮށްފައި މިނީ ފުޓްސަލް ދަނޑެއްވެސް ޕާކުގައި ހަދާފައިވާ ކަމަށް އެ ކޯޕަރޭޝަނުން ބުނެއެވެ.
