ކޮވިޑް-19 އަށް ޝައްކު ކުރެވިގެން ވ. ތިނަދޫއިން އެކަހެރި ކުރި ފަތުރުވެރިޔާގެ ޓެސްޓުތައް އެ ބައްޔަށް ނެގެޓިވްވެއްޖެ އެވެ.
Advertisement
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ކޮވިޑް-19 ގެ އަލާމާތްތައް ހުރި ކަމަށް ޝައްކު ކުރެވިގެން ވ. ތިނަދޫން އައިސޮލޭޝަން ފެސިލިޓީއަށް ގެންދިޔަ ފަރާތުގެ ޓެސްޓު ނެގެޓިވްވެފައިވާ ކަމަށެވެ.
އިޓަލީގެ ފަތުރުވެރިޔަކު ކޮވިޑް-19 އަށް ޝައްކު ކުރެވިގެން އިއްޔެ ވަނީ ވ. ތިނަދޫއަށް އަރައި ފޭބުން ވަގުތީ ގޮތުން މަނާކޮށްފަ އެވެ. އަދި އެ ފަތުރުވެރިޔާ ހުރީ ފަރުކޮޅުފުށީގައި ކަރަންޓީންކޮށްފަ އެވެ.
އެޗްޕީއޭއިން މިއަދު ބުނީ އެމީހާގެ ޓެސްޓު ނެގެޓިވްވި ނަމަވެސް، ބައްޔަށް ޝައްކު ކުރެވޭ އަލާމާތްތައް އަދިވެސް ހުރުމާއެކު 24 ގަޑިއިރު ފަހުން އިތުރަށް ޓެސްޓް ކުރެވޭނެެ ކަމަށެވެ.
"މިކަމާ ގުޅިގެން ވ. ތިނަދޫގެ “ކޮންޓެކްޓް ޓްރޭސިން" ހެދުމާއި ބަލަން ޖެހޭ އެހެނިހެން ބެލުންތައް ބެލުމަށް ފަހު މިހާރު އެރަށަށް އަރާ ފޭބުމަށް ހުރަހެއް ނެތް ކަމަށް އަންގަން،" އެޗްޕީއޭއިން ބުންޏެވެ.
ތިނަދޫ ވަގުތީ ގޮތުން އެކަހެރި ކުރި ކުރުން ނިމުމަކަށް ގެނެސްފައި ވާއިރު، ރޭ ވަނީ ޅ. އަތޮޅުގައި އޮންނަ ކުރެއްދޫ އައިލެންޑް ރިސޯޓަށް ވެސް މީހުން އަރައި ފޭބުން މަނާކޮށްފަ އެވެ.
އެ ރަށުގައި ޗުއްޓީ ހޭދަކުރުމަށް ފަހު އެނބުރި ގައުމަށް ދިޔަ މީހަކު ވައިރަހަށް ޕޮޒިޓިވްވެފައި ވާއިރު އޭނާ ރާއްޖެއިން ދެއްކި ޑޮކްޓަރު ވެސް މި ބަލީގެ އަލާމާތްތައް ފެނި މިހާރު ވަނީ ކަރަންޓީންކޮށްފަ އެވެ.
އޭގެ އިތުރުން މިއަދު ވަނީ ސަމާ އައިލެންޑް ރިސޯޓަށް އަރައި ފޭބުން ވެސް މަނާކޮށްފަ އެވެ. އެއީ އެ ރިސޯޓުގައި ޗުއްޓީ ހޭދަ ކުރަމުން ދިޔަ ފަރަންސޭސިވިލާތުގެ ދެ ފަތުރުވެރިޔަކު މި ވައިރަހަށް ޝައްކު ކުރެވިގެންނެވެ.
މި ވަގުތު ހަތް މީހަކު ކެރެންޓީނުގައި ހުރިއިރު، އޭގެ ތެރެއިން ހަ މީހެއްގެ ޓެސްޓުގެ ނަތީޖާ އަދި ލިބިފައެއް ނުވެ އެވެ.
