ރާއްޖެއިން ބޭރުގެ ކުންފުނި ތަކަށް ވަގު ޓީޓީ ފޮނުވައިގެން މުދާ އެތެރެކުރާ ކަމުގެ ތުހުމަތުގައި ހައްޔަރު ކުރި މީހާގެ ބަންދަށް މި ފަހަރުވެސް ޖެހީ 15 ދުވަހެވެ. ފުރަތަމަވެސް އަދި ދެވަނަ ފަހަރުވެސް ބަންދަށް ޖެހީ 15 ދުވަހެވެ.
ރާއްޖެއިން ބޭރުގެ އެކި ގައުމުތަކުގެ ކުންފުނިތަކުން ދިވެހި ރާއްޖެއަށް މުދާ އެތެރެކޮށް އެ މުދަލުގެ އަގު އަދާކުރުމުގެ ގޮތުން އެފަރާތްތަކަށް ސައްހަ ނޫން ޓެލެގްރަފިކް ޓްރާންސްފަރ (ޓީ.ޓީ) ފޮނުވައި، މަކަރާއި ހީލަތުން އޮޅުވާލައިގެން މުދާ އެތެރެކުރާ މައްސަލައެއްގައި ހައްޔަރުކޮށްފައި ވަނީ މއ. ހަނީސަކަލް 1 ހުސެއިން ޝިފާއުއެވެ.
ހުސެއިން ޝިފާއުއަކީ ޑޮލަރު ދޭނެކަމަށް ބުނެ މަކަރާއި ހީލަތުން ފައިސާ ހޯދައި، އެފައިސާ ނުދީ ފިލައިގެން އުޅޭކަމަށް ތުހުމަތުކުރެވޭ މައްސަލައެއްގެ ތަހުގީގަށް ހާޒިރު ކުރަން ބޭނުންވެގެން ކުރިން ފުލުހުން އިއުލާންވެސް ކޮށްފައިވާ މީހެކެވެ. 2021 ވަނަ އަހަރު ފުލުހުން އޭނާ ހޯދަން އިއުލާންކޮށްފައިވެއެވެ.
ކްރިމިނަލް ކޯޓުގެ ރިޕޯޓުން އެނގޭ ގޮތުގައި މިއީ ތަރުކާރީއާއި މޭވާ އެތެރެކުރާ މީހެކެވެ. މި ފަހަރު ދިމާވެގެން މިއުޅޭ ޓީޓީގެ މައްސަލައަކީ ވެސް އޮޅުވާލައިގެން ތަރުކާރީއާ މޭވާ އެތެރެކުރުމުގެ މައްސަލައެއް ކަމަށް ކްރިމިނަލް ކޯޓުގެ ބަންދު އަމުރު ރިޕޯޓުން އެނގެއެވެ.
އޮޅުވާލައިގެން މީނާ ހައްދާފައިވާ ޓީޓީތަކުގެ ޖުމްލަ ތިން މިލިއަނަށްވުރެ މަތިވާނެ ކަމަށް މައުލޫމާތު ލިބިފައިވެއެވެ. މި މައްސަލައިގެ ތަހުގީގަށް އިންޓަޕޯލްގެ އެހީ ހޯދަމުން ގެންދާކަމަށް ފުލުހުންވަނީ ބުނެފައެވެ. ފުލުހުން ބުނީ ތަހުގީގަށް ލިބޭ ކުރިއެރުމަށް ބަލާއިރު ޝިފާއިގެ މަކަރުގައި ޖެހިފައިވާ ކުންފުނިތައް އިތުރުވާނެކަމަށް ބެލެވެއެވެ. އެ ކުންފުނިތައް ހޯދުމަށް އިންޓަޕޮލްގެ އެހީތެރިކަން ހޯދަމުން ގެންދާ ކަމަށެވެ.
ފުލުހުން އޭނާގެ މައްޗަށް މަކަރާއި ހީލަތުގެ އިތުރުން ފޯޖަރީގެ ތުހުމަތުވެސް ކުރެއެވެ.
