ހުޅުމާލެ ފޭސް 2 އިން ގޯތިދޭ މީހުންގެ ލިސްޓްކަމަށް ބުނެ އިއްޔެއިން ފެށިގެން ސޯޝަލް މީޑިއާގައި ލިސްޓެއް އާއްމުކުރަމުން ދާއިރު، ލިސްޓުން ފެންނަނީ މުޅިންވެސް ޅ ހިންނަވަރުގެ މީހުންނާއި، އެމީހުންނަށް ލިބިފައިވާ ޕޮއިންޓެވެ.
ލިސްޓް ސޯޝަލް މީޑިއާގައި ޝެއާ ކުރަމުންދާ މީހުން ބުނީ، ހުޅުމާލެ ފޭސް 2 އިން ގޯތިދެނީ ހިންނަވަރު މީހުންނަށް ކަމަށެވެ. ޅ ހިންނަވަރަކީ ރައީސް އިބްރާހިމް މުހައްމަދު ސޯލިހްގެ ރަށެވެ.
ލިސްޓާ ގުޅޭގޮތުން ސަރުކާރުގެ އޮފިޝަލަކު މިއަދު "ސީއެމްއެމް" އަށް ވިދާޅުވީ، ދައުރުވަމުން ދަނީ ފޭސް 2 އިން ގޯތިދޭ މީހުންގެ ލިސްޓެއް ނޫންކަމަށާއި ލިސްޓަށް ބަލާލުމުންވެސް އެކަން އެނގޭކަމަށެވެ. އަދި ލިސްޓަށް ބަލާލުމުން ބޮޑަށް ބެލެވެނީ އެއީ ހިންނަވަރުން ގޯތިދޭ މީހުންގެ ލިސްޓެއްކަމަށް ވެސް އޮފިޝަލް ވިދާޅުވިއެވެ.
މާލޭ ގޯތިދޭ މީހުންގެ ލިސްޓްކަމަށް ބުނެ، ލިސްޓެއް ސޯޝަލް މީޑިއާގައި އާއްމުވެފައިވާއިރު، މާލޭން ގޯތި އަދި ފްލެޓް ލިބޭ މީހުންގެ ލިސްޓް އަދި އެކުލަވާލާ ނުވެސް ނިމެއެވެ.
