މައުލޫމާތު ލިބިފައިވާ ގޮތުގައި ޖެންނޭ ހައްޔަރުކޮށްފައިވަނީ މާރާމާރީއެއްގެ މައްސަލައެއްގައި ފުލުހުން ހޯދަމުންދިޔަ މީހަކު ފޮރުވައިގެން ގެންގުޅުނު ކަމަށް ތުހުމަތުކޮށް ކޯޓު އަމުރެއް ދަށުންނެވެ.
ޖެންނޭ ހައްޔަރުކޮށްފައިވަނީ މިދިޔަ މަހު ފަހުކޮޅު ކުޅުނު ގޯލްޑަން ފުޓްސަލް ޗެލެންޖުގެ ފައިނަލް މެޗު ނިމުނުތަނާއެވެ. ކޯޓުން އޭނާ މިއަދު ދޫކޮށްލީ ޝަރުތުތަކެއް ކުރުމަށް ފަހުއެވެ. އޭނާ ދޫކޮށްލިއިރު އޭނާވަނީ އޭނާ ހައްޔަރު ކުރި މައްސަލަ ހައިކޯޓުގައި އިސްތިއުނާފުކޮށްފައެވެ.
ގޯލްޑަން ފުޓްސަލް މުބާރާތުގެ ފައިނަލް މެޗު ހަމަ ނިމުނުތަނާ ޖެންނޭ ހައްޔަރު ކުރިއިރު، އެ މުބާރާތުގެ ޗެމްޕިއަންކަން ހޯދީ ޖެންނޭ ކުޅުނު ލ. ގަމު ޓީމެވެ. ޖެންނޭއަކީ ލ. އަތޮޅު ގަމަށް، ގޯލްޑަން ފުޓްސަލް ޗެލެންޖު ކާމިޔާބުކޮށްދިނުމުގައި މުހިއްމު ދައުރެއް އަދާކުރި ކުޅުންތެރިއެކެވެ.
ފައިނަލް މެޗު ކުޅެމުން ދިޔަ ވަގުތު ކޯޓު އަމުރާ އެކު، އެ ކުޅުންތެރިޔާ ހައްޔަރުކުރަން ފުލުހުން ނިންމިޔަސް އޭނާ ގެންދިޔައީ ފައިނަލް މެޗު ނިމުމުންނެވެ.
ފުލުހުންގެ ބެލުމުގެ ދަށަށް ޖުނައިދު ގެންގޮސްފައި ވަނީ މެޗު ނިމުމާ އެކުއެވެ. މުބާރާތުގެ އެވޯޑް ހަފްލާގައި އޭނާއަށް ބައިވެރި ނުވެވޭ ކަމަށްވަނީ މައުލޫމާތު ލިބިފައެވެ. ޖެންނޭ ހައްޔަރު ކުރި މައްސަލަ ހައިކޯޓަށް ހުށަހަޅާފައިވަނީ މިދިޔަ ހަފްތާގައެވެ.
އެ މައްސަލަ ހައިކޯޓުގައި މިހާރު ރަޖިސްޓްރީކޮށްފައިވާ ކަމަށް ހައިކޯޓުގެ ރަޖިސްޓްރީން ދައްކައެވެ. އެހެންނަމަވެސް އޭނާ މިހާރު ދޫކޮށްލާފައިވުމުން ހައިކޯޓުގައި އޮތް މައްސަލައަށް ވާނެ ގޮތެއް އަދި ނޭނގެއެވެ.
