ރާއްޖޭގެ ބައެއް މީޑިއާތަކުގައި ރިޕޯޓްކޮށްފައި ވާގޮތުން، އަރަބިއްޔާގެ އިމްތިހާނެއް ކުރިއަށްދިޔަ ވަގުތު އަންހެން ދަރިވަރެއްގެ މޫނު ބުރުގާ ނެގުމަށް މަޖުބޫރު ކުރުވާ، އަދި އެދަރިވަރާ ދިމާއަށް ޓެރަރިސްޓަކަށް ވާން ބޭނުންހޭ ބުނެ މުހާތަބު ކުރިކަމަށް ބުނެފައިވެއެވެ.
އަދި އެހެން ރިޕޯޓެއް ބުނާގޮތުން ތުނބުޅި ބަހައްޓައިގެން ސްކޫލަށް ދިޔަ ފިރިހެން ދަރިވަރަކާއި ދިމާއަށްވެސް "ޓަރަރިސްޓެއް" ކަމަށް ނިސްބަޔްކޮށް އަރަބިއްޔާގެ ބައެއް މުވައްޒަފުން ވާހަކަ ދައްކާފައި ވެއެވެ. ނަމަވެސް އެއިން އެއްވެސް ރިޕޯޓެއްގައި ސްކޫލުގެ ބަހެއް ހިމަނާފައެއް ނުވެއެވެ.
އަަރަބިއްޔާ ސްކޫލުން މިއަދު ނެރުނު ބަޔާނެއްގައި ބުނީ އަރަބިއްޔާ ސްކޫލުގެ އެއްވެސް ކުއްޖަކީ ޓެރަރިސްޓެއް ކަމަށް ބުނެފައިނުވާނެ ކަމަށާއި އެފަދަ މާނައެއް ދޭހަވާނެ ބަހެއްވެސް ބުނެފައި ނުވާކަމަށެވެ. އަދި އެފަދަ ވާހަކަތައް ބަޔަކު ފަތުރަނީ ފިތުނަ އުފެއްދުމަށް ކަމަށްވެސް އެ ސްކޫލްގެ ބަޔާނުގައި ބުނެފައި ވެއެވެ.
އަދި ސްކޫލް ޔުނޫފޯމް ކޯޑާ ހިލާފުވެގެން ވެސް އެއްވެސް ކުއްޖަކަށް ބިރުދެއްކުމުގެ އެއްވެސް އަމަލެއް ސްކޫލުން ހިންގާފައި ނުވާކަމަށްވެސް ސްކޫލުގެ ބަޔާނުގައި ބުނެފައި ވެއެވެ.
އެ ސްކޫލް ބަދުނާމުވާފަދަ ހަގީގަތާ ހިލާފު އެފަދަ ވާހަކަތައް ނުދެއްކުމަށާއި އެފަދަ ވާހަކަތައް ނުފެތުރުމަށް އަރަބިއްޔާގެ ބަޔާނުގައި އިލްތިމާސް ކޮށްފައި ވެއެވެ.
