ހިޔާގެ 16 ޓަވަރުގައި، 30000 އަށް ވުރެ ގިނަ މީހުން ދިރިއުޅޭކަމަށް ލަފާކުރެވޭއިރު، އެތަނުގައި އުޅޭ ބައެއް މީހުންގެ ނޭއްގާނީ އަމަލުތަކުގެ ވާހަކަ މީގެކުރިންވެސް ދެއްކިފައި ވެއެވެ. ރޭ ހިނގައިދިޔަ އަލިފާނުގެ ހާދިސާއަކީވެސް އެފަދަ ކަންކަން އެތައް ފަހަކަރު ތަކުރާރުވުމަށްފަހު ހިނގި ކަމެކެވެ.
ހިޔާ ފްލެޓް ޔޫނިއަންގެ ވައިބަ ކޮމިއުނިޓީން އެކަން ވަރަށް ސާފުކޮށް އެނގެއެވެ. އަދި މީގެކުރިންވެސް އެފަދަ އެތައްކަމެއް ސަމާލުކަމަށް ގެނެސް ކޮމިއުނިޓީގައި ބަހުސްކުރެވި ވާހަކަ ދެކެވިފައި އެބަހުއްޓެވެ. ކުނީގެ މައްސަލަތަކާއި ރައްކާތެރި ނޫން ގޮތުގައި ހިޔާގައި ކުރެވޭ ބައެއް ކަންކަމުގެ ވާހަކަ އެވެ.
ހިޔާ ޓަވަރުގައި ރޭ ރޯވިތަން: ފޮޓޯ އެމްއެންޑީއެފް
އެގޮތުން ދާދިފަހުން މީހަކު ކޮމިއުނިޓީއަށް ލީ ފޮޓޮއެއްގައި ފެންނަނީ ހިޔާގެ އެޕާޓްމަންޓެއްގެ ބެލްކަނިން މަގުމައްޗަށް ވާގޮތަށް ރެއިލިންގައި އައްސާފައިހުރި ބައިސްކަލެކެވެ. އެ ބައިސްކަލު އެއްސިމީހަކު އެކަންކޮށްފަހުރި މޮޅުގޮތެއް ސާފުނުވާކަމަށާއި ވެއްޓި މީހަކަށް ބޮޑު އަނިޔާއެއް ލިބޭނީ ކޮން އިރަކުކަން ނޭންގޭކަމަށްވެސް ޕޯސްޓުގައި ބުނެފައިވެއެވެ.
އެހެން މީހަކު ވަނީ އޭނާގެ އެޕާޓްމަންޓްގެ ބެލްކަނީގައި ފުޅިމަދު ފޮށިގަނޑެއްގައި ހުރި ކުނިތަކެއްގައި މީގެކުރިން ރޯވުމުން ނިއްވާލާފައިވާ ފޮޓޮއެއްވެސް ކޮމިއުނިޓީއަށް ފޮނުވާފައެވެ.
ހިޔާ އެޕާޓްމަންޓެއްގެ ބެލްކަނީގައި ހުރި އެއްޗެހިތަކެއް އަންދާފައި
މަތީ އެޕާޓްމަންޓްތަކުން ތިރީގެ އެޕާޓްމަންޓްތަކަށް އެއްޗެހި ވެއްޓުމާއި ސިނގިރޭޓް ފިލްޓަރު އާއްމުކޮށް ވެއްޓުމަކީ ހިޔާގެ ބައެއް މީހުންގެ ނިމުމެއްނެތް ދާއިމީ ޝަކުވާއެކެވެ. ނަމަވެސް އެތަނުގައި މަދުން ނަމަވެސް އުޅޭ ބައެއް "ގޮތްކުޑަ އުޅުމެއްނެތް މީހުނަށް" އެކަން ފަހުމެއް ނުވެއެވެ.
ރޭގެ ހާދިސާގައި ބޮޑުވަރު ނުވަނީސް އަލިފާން ނިއްވާލެވުނު ނަމަވެސް އެކަން އެގޮތަށް ކޮންމެ ފަހަރަކު ނުވެދާނެއެވެ. އަދި ކިތައްމެ ކުޑަކޮށް ހިނގި ހާދިސާއެއް ނަމަވެސް ބަޔަކަށް އެކަމުން ލިބޭނެ ނަފްސާނީ ގެއްލުމަކީ ކުޑަކަމަށްވެސް ނުވާނެއެވެ.
ވައިބަ ކޮމިއުނިޓީއަށް މީހަކު ފޮނުވި ޕޯސްޓެއް
ރޭގެ ހާދިސާއަށް ފަހު ހިޔާފްލެޓް ޔޫނިއަންގެ ވައިބަ ކޮމިއުނިޓީގައި އަނެއްކާވެސް އެވާހަކަތައް އާވިއެވެ. ބައެއް މީހުންވަނީ ސިނގިރޭޓް ފިލްޓަރުގެ މައްސަލައަކީ ހައްލު ނުވި ބޮޑު މައްސަލައެއްކަމަށް ބުނެފައެވެ.
ބައެއް މީހުން ބުނީ ސިނގިރޭޓް ފިލްޓަރުގެ އިތުރުން ސިނގިރޭޓް އަޅީގެ އުނދަގޫވެސް އެމީހުނަށް ކޮންމެ ދުވަހަކު ޖެހޭ ކަމަށެވެ. އެގޮތުން ބެލްކަންޏާއި އެޕާޓްމަންޓް ތެރެއަށް އަޅިތައްއެޅޭ ދުވަސް މަދު ނޫންކަމަށްވެސް އެމީހުން ބުނެއެވެ.
ސިންގިރޭޓް ފިލްޓަރުގެ މައްސަލާގައި އެކަން ނުކުރުމަށް ބައެއް މީހުން ކައިރީބުނެ ނުހުއްޓުމުން އެކަން އެޗްޑީސީއަށްވެސް އަންގާފައިވާނެކަމަށާއި ނަމަވެސް އެކަން ކުރާމީހުން އެކަން ނުހުއްޓިކަމަށް ބައެއް މީހުން ބުނެފައިވެއެވެ.
ކޮންމެއަކަސް ރޭ އަލިފާނުގެ ހާދިސާ ހިނގި ނަމަވެސް ، ސިނގިރޭޓް ފިލްޓަރު ބެލްކަންޏަށް ވެއްޓުމަކީ ކޮންމެ ދުވަހަކުވެސް ހިޔާ ފްލެޓްގެ ބައެއް އެޕާޓްމަންޓްތަކުން ކުރަންޖެހޭ ޖަތުރިބާއެކެވެ. އެކަން ނުވެސް ހުއްޓިއެވެ. މިކަމަށް އޮތް ހައްލަކީ ކޮބައިތޯއެވެ. ހިޔާގެ ރައްޔިތަކު ބުނިހެން އެކަން ކުރާ އެޕާޓްމަންޓާއި މީހުންގެ މައުލޫމާތު އާއްމު ކުރަންވީ ހެއްޔެއެވެ.؟
