މިދިޔަ ހުކުރު ދުވަހުގެ އިރުއޮއްސުނުތަނާހެން ރަަށުތެރެއަށް ފެތުރިގެން ދިޔަ ހަބަރާ ވިދިގެން އިވެން ފެށި އަޑުތަކާއި އެކި ގޮތްގޮތަށް ތުންތުންމަތިން ފެތުރެން ފެށި ވާހަކަތަކާ ގުޅިގެން މަނަދޫގައި ދިރިއުޅެމުން އަންނަ ފަރާތްތަކުގެ މެދުގައި ވަނީ ނުތަނަވަސްކަމާއި މާޔޫސްކަން އުފެދިފައެވެ.
ރަށުގައި ހިނގާދިޔަ މި ހިތާމަވެރި ހާދިސާ އާ ގުޅިގެން ރަށުގެ ހާލަތާ ގުޅޭގޮތުން މަނަދޫ ކައުންސިލުގެ ރައީސް އަބްދުއްރަހްމާން ސޮބީހު "ސީއެންއެމް" އަށް ވިދާޅުވެފައިވަނީ ކުއްލިއަކަށް މިވަރުގެ ބިރުވެރި، އަނިޔާވެރި ހާދިސާއެއް ހިނގައިދިޔައީމާ ވަރަށް ބޮޑެތި ބަދަލުތަކެއް އައިސްފައިވާ ކަމަށް ފާހަގަކުރެއްވޭ ކަމަށެވެ. ރަށުގެ ރައްޔިތުންގެ ތެރޭގައި ބިރުވެރިކަމާއި ސިހުމުގެ އިތުރުން ކަންބޮޑުވުން ވަރަށް ބޮޑަށް އެބައޮތްކަން ހާމަކުރައްވާ ސޮބީހު ވިދާޅުވި ގޮތުގައި ރައްޔިތުންގެ ތެރެއިން ގިނަ ފަރާތްތަކެއްގެ ސުވާލަކަށްވެފައިވަނީ ހިނގާދިޔަ ހާދިސާއަކީ ކީއްވެގެން ހިނގާދިޔަ ހާދިސާއެއްތޯ ކުރެވޭ ސުވާލު ކަމުގައެވެ.
ސޮބީހު ވިދާޅުވީ އެވަރުގެ ކަމެއް ވާން ދިމާވި މަގުސަދަކީ ކޮބައިތޯ އާއި އެވަރުގެ ކަމެއް ކުރާނީ ކާކުތޯ ފަދަ ސުވާލުތައް ރަށުގެ ރައްޔިތުން ކުރަމުންދާ ކަމަށެވެ. ވި ވަގުތު ތަހުގީގު މަރުހަލާ ހިންގަމުން ދާތީވެ، މާގިނަ ތަފުސީލުތަކެއް ލިބިފައި ނުވާ ކަމަށް ސޮބީހު ވިދާޅުވިއެވެ.
ރަށު ކައުންސިލުގެ ރައީސް ވިދާޅުވީ ރަށުގައި ދިރިއުޅެމުން އަންނަ ރައްޔިތުންގެ ސަލާމަތާއި ރައްކާތެރިކަމަށްޓަކައި ފިޔަވަޅުތަކެއް އެޅެން ޖެހޭ ކަމަށް ގަބޫލުކުރައްވާ ކަމަށެވެ. އެގޮތުން ކުރެވިދާނެ ކަންތައްތައްތަކާ ގުޅޭގޮތުން މަޝްވަރާ ކުރުމަށް ރަށު ކައުންސިލުގެ ފަރާތުން މި ރަށުގައި ހުންނަ އަތޮޅު ޕޮލިސް ސްޓޭޝަނުގެ އިސްވެރިންނާ ބައްދަލުކޮށްފައިވާ ކަމަށް ސޮބީހު ވިދާޅުވިއެވެ.
މަނަދޫ، އަންނާރުމާގެ، ނައީމާ މޫސާގެ މަރާ ގުޅޭގޮތުން މި މަހުގެ އަށްވަނަ ދުވަހު ފުލުހުން ނެރުނު ނޫސްބަޔާނެއްގައި ބުނެފައިވަނީ ނައީމާގެ ހަބަރެއް ނުވެގެން އާއިލާގެ ފަރާތުން ރިޕޯޓުކޮށްފައިވަނީ އެޕްރީލް ހަތްވަނަ ދުވަހުގެ 18:13 ހާއިރު ކަމަށާއި އެ ރިޕޯޓާ ގުޅިގެން ނައީމާ ދިރިއުޅޭ ގެއަށް ވަދެ ބެލިއިރު އޭނާ ދިރިއުޅޭ ކޮޓަރިތެރޭ ތަޅުންގަނޑުމަތީގައި އަނިޔާތަކާ އެކު މަރުވެފައި އޮތްވާ ފެނިފައިވާ ކަމަށެވެ.
ނައީމާގެ މަރުގައި ތުހުމަތު ކުރެވޭ ކަންތައްތަކެއް ފާހަގަކުރެވިފައިވާތީ މައްސަލައިގެ ތަހުގީގު ކުރިއަށް ގެންދަނީ ހޮމިސައިޑް އިންވެސްޓިގޭޝަނެއްގެ ގޮތުގައި ކަމަށް ފުލުހުންގެ ފަރާތުން ނެރުނު ބަޔާނުގައިވެއެވެ.
ފުލުހުންގެ އެ ބަޔާނުގައި ވަނީ ފުލުހުންގެ ހިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ހާއްސަ ތަހުގީގު ޓީމަކާއި ފޮރެންސިކް ތަހުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް މަނަދޫގައި ހަރަކާތްތެރިވަމުންދާ ކަމަށާއި ނައީމާގެ ހަށިގަނޑު ބަލައި، ތަހުލީލުތަކަށް ބޭނުންވާ ސާމްޕަލް ނެގުމަށްފަހު އިތުރަށް ޕޯސްޓްމޯޓަމް ހަދަން ޖެހޭ ސަބަބެއް ނެތްކަމަށް، ފުލުހުންގެ ފޮރެންސިކް ޕެތޮލޮޖިސްޓް ނިންމުމުން ހަށިގަނޑު އާއިލާ އާ ހަވާލުކުރެވި އެ ދުވަހުގެ 17:20 ގައި ވަޅުލާފައިވާ ކަމަށެވެ.
ނައީމާގެ މަރާ ގުޅޭ އެެއްވެސް މައުލޫމާތެއް ލިބިފައިވާ ފަރާތެއް ވާނަމަ ފުލުހުންގެ ހިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 އަށް ގުޅައި ހިއްސާކޮށްދިނުމަށް ފުލުހުންގެ ފަރާތުން ނެރުނު އެ ބަޔާނުގައި އެދިފައިވެއެވެ.
ފުލުހުންގެ ފަރާތުން ނެރުނު މި ބަޔާނުގެ އިތުރަށް ރަސްމީ ގޮތުން މިހާތަނަށް އެއްވެސް މައުލޫމާތެއް ފުލުހުން ހާމަކޮށްފައި ނުވާއިރު، އިތުރަށް ބުނެފައިވަނީ މި މައްސަލަ އާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށާއި މައްސަލައިގެ ތަހުގީގު ކުރިއަށް ދާތީ ކަމާ ގުޅުންހުރި މައުލޫމާތު ހިއްސާކުރެވެން ނެތް ކަމަށެވެ.
