މިދިޔަ ހުކުރު ދުވަހުގެ އިރުއޮއްސުނުތާ މާގިނައިރުތަކެއް ނުވެ ހިނގާދިޔަ ހާދިސާ އާ ގުޅޭގޮތުން މަނަދޫ ކައުންސިލުގެ ރައީސް "ސީއެންއެމް" އަށް ވިދާޅުވި ގޮތުގައި އެ ހާދިސާއަކީ މަނަދޫގެ ދިގު ތާރީހުގައި ހިނގާފައި ނުވާ ވަރުގެ ވަރަށް ބޮޑު، ވަރަށް ހިތާމަވެރި ހާދިސާއެއް ކަމުގައެވެ.
ހިނގާދިޔަ މި ހިތާމަވެރި ހާދިސާ އާ ގުޅިގެން ރަށުގެ ހާލަތާ ގުޅޭގޮތުން ސޮބީހު ވިދާޅުވެފައިވަނީ ރަށުގެ ރައްޔިތުން ޖުމްލަގޮތެއްގައި ތިބީ ވަރަށް ބޮޑު ޝޮކެއްގައި ކަމަށެވެ.
ސޮބީހު ވިދާޅުވި ގޮތުގައި ކުއްލިއަކަށް މިވަރުގެ ބިރުވެރި، އަނިޔާވެރި ހާދިސާއެއް ހިނގައިދިޔައީމާ ވަރަށް ބޮޑެތި ބަދަލުތަކެއް އައިސްފައިވާ ކަމަށް ފާހަގަކުރެއްވޭ ކަމުގައެވެ. ރަށުގެ ރައްޔިތުންގެ ތެރޭގައި ބިރުވެރިކަމާއި ސިހުމުގެ އިތުރުން ކަންބޮޑުވުން ވަރަށް ބޮޑަށް އެބައޮތްކަން ހާމަކުރައްވާ ސޮބީހު ވިދާޅުވީ މި މުޖުތަމައަކީ ވަރަށް އަމާންއޮމާންކޮށް އޮތް މުޖުތަމައެއް ކަމަށާއި މި މުޖުތަމައުގެ ތެރޭގައި އުޅެމުންދާ އެއްވެސް މީހަކު މިވަރުގެ ކަމެއް ހިނގައިދާނެ ކަމަކަށް އުންމީދު ނުކުރާނެ ކަމަށެވެ.
ހާދިސާ އާ ގުޅިގެން ރައްޔިތުންގެ ކަންބޮޑުވުންތަކާއި ބިރުވެރިކަން އެބައޮތްކަން ފާހަގަކުރައްވާ ސޮބީހު ވިދާޅުވީ ނަފްސާނީ ގޮތުންވެސް ބައެއް ފަރާތްތަކަށް އުދަނގޫތަކެއްވެ، ގެއްލުންތަކެއް ވަމުންދާ ކަމުގެ ރިޕޯޓުތައް އެ ކައުންސިލަށް ލިބެމުންދާކަން ފާހަގަކުރަން ބޭނުންފުޅުވާ ކަމަށެވެ.
