އާ ސީޒަނުގައި ސަސް އިން ކުޅޭ ފުރަތަމަ މެޗުގައި ހުކުރު ދުވަހުގެ ރޭ ބައްދަލުކުރާނީ އެންމެ ފަހުގެ ޕްރެޒިޑެންޓްސް ކަޕްގެ ޗެމްޕިއަން، ކްލަބް ވެލެންސިއާ އެވެ. ވެލެންސިޔާއާ ދެކޮޅަށް ހުކުރު ދުވަހުގެ ރޭ ނުކުންނައިރު، ސަސްގެ ކޯޗު އިންމަވަނީ ބޮޑެތި ގޮންޖެހުންތަކަކާ އެ ކުލަބުން ކުރިމަތިލާން ޖެހިފައިވާކަން ފާހަގަކޮށްފައެވެ.
ސީޒަންގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕް މިހާރު ފެށިފައިވާއިރު، ފުރަތަމަ ޑިވިޝަނުގައި މި ފަހަރު ވާދަކުރާ އަށް ޓީމުގެ ތެރެއިން ޕްރީ ސީޒަނެއް ރަނގަޅަށް ފުރިހަމަ ކުރީ ދެ ޓީމުންނެވެ. އެއީ މާޒިޔާ އަދި އީގަލްސް އެވެ.
ދެން ތިބި ޓީމުތަކަށް ޕްރީ ސީޒަނެއް ނުހެދޭތާ ދެ ޓީމަކުން ޕްރެޒިޑެންޓްސް ކަޕުގައި ބައިވެރިވެސް ނުވެއެވެ. ޓީމުގެ މާލީ ހާލަތާއި އެޑްމިނިސްޓްރޭޝަން ކަންތައްތަކެއްގެ ސަބަބުން ޕްރެޒިޑެންޓްސް ކަޕުގައި ނުކުޅެނީ ޔުނައިޓެޑް ވިކްޓަރީ (ޔޫވީ) އާއި ކްލަބް ގްރީން ސްޓްރީޓްސްއެވެ.
