އިންޑިއާގެ ބެންގަލޫރުގައި އިއްޔެ ފެށި އިންޑިއަން ގްރޯން ޕްރީގެ ހަތަރުވނަ މުބާރާތުގައި ސާއިދު ރިހި މެޑެލް ހޯދީ 100 މީޓަރު ދުވުމުންނެވެ.
މި ރޭސް ސާއިދު ނިންމާފައިވަނީ 10.66 ސިކުންތުންނެވެ. މި ބައިގެ އެއްވަނައަށް ދިޔަ އައްސާމުގެ އަމްލާން ބޯގޮހޭން ރޭސް ނިންމީ 10.53 ސިކުންތުންނެވެ. ތިންވަނަ ހޯދި ޓަމިލް ނާޑޫގެ ރަގުލް ކުމާރް ރޭސް ނިންމާފައިވަނީ 10.77 ސިކުންތުންނެވެ.
އިންޑިއަން ގްރޯން ޕްރީގެ ހަތަރުވަނަ މުބާރާތުން ސާއިދު ރިހި މެޑެލް ހޯދިއިރު، އޭނާ ވަނީ އިންޑިއަން ގްރޯން ޕްރީގެ ފުރަތަމަ މުބާރާތުގެ 100 މީޓަރު ދުވުމުންނާއި 200 މީޓަރު ދުވުމުން ރަން މެޑެލް ހޯދާފައެވެ.
އިންޑިއަން ގްރޯން ޕްރީގެ ދެވަނަ މުބާރާތުން ސާއިދު ވަނީ 200 މީޓަރު ދުވުމުން ރިހި މެޑެއްޔާއި 100 މީޓަރު ދުވުމުން ލޯ މެޑެލް ހޯދާފައެވެ. އަދި ތިންވަނަ މުބާރާތުން ސާއިދު ވަނީ 100 މީޓަރު އަދި 200 މީޓަރު ދުވުމުން ލޯ މެޑެލް ހޯދާފައެވެ.
