ކުރެއްދޫ ރިސޯޓުގައި މަސައްކަތް ކުރަމުން ދިޔަ ދެ ބިދޭސީ މުވައްޒަފުން ކޮވިޑް-19 އަށް ޕޮޒިޓިވް ވުމުން ޓީއެމްއޭ އިން ޑިސްއިންފެކްޓް ކޮށްފައި ވަނީ އެ ރިސޯޓަށް ފަތުރުވެރިން އުފުލަން ބޭނުން ކުރި 8Q-MAZ ޓުވިން އޮޓާ މަރުކާގެ ސީޕްލޭން އެވެ.
ކުރެއްދޫ އަށް މިހާރު މީހުން އަރާ ފޭބުން މަނާކޮށްފައި ވާއިރު، ސަރުކާރުން ދަނީ ކުރެއްދޫގައި ޗުއްޓީ ހޭދަކުރުމަށް ފަހު ގައުމަށް ދިޔަ ކޮވިޑް-19 އަށް ޕޮޒިޓިވް ވެފައިވާ އިޓަލީގެ ފަތުރުވެރިޔާއާއި ކޮންޓެކްޓްވި ފަރާތްތައް ހޯދާ ސްކްރީން ކުރުމުގެ މަސައްކަތް ކުރަމުންނެވެ.
ކުރެއްދޫގައި ރޫމް އައިސޮލޭޝަންގައި 93 މީހަކު ތިބި ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެފައި ވާއިރު ރިސޯޓުގައި 699 ފަތުރުވެރިންނާއި ރިސޯޓުގައި ތިބި މުއައްޒަފުންނާއި ބިދޭސީ މަސައްކަތްތެރިންގެ އަދަދު 628 އަށް އަރާ ކަމަށް ޓޫރިޒަމް މިނިސްޓަރު އަލީ ވަހީދު ވަނީ ވިދާޅުވެފަ އެވެ.
ކުރެއްދޫ އިން ވަނީ ފެބްރުއަރީ މަހުގެ 23 އިން މާޗް މަހުގެ 6 ވަނަ ދުވަހާއި ދެމެދު އެ ރިސޯޓަށް ޒިޔާރަތް ކޮށްފައިވާ ފަރާތްތަކުން ކޮވިޑް-19 ގެ އަލާމާތްތައް ފެންނަ ނަމަ ސަމާލުވުމަށް އަންގާފަ އެވެ. އަދި ބަލީގެ އަލާމާތެއް ފެނިއްޖެނަމަ ލަސްނުކޮށް ކަމާބެހޭ އިދާރާތަކަށް އެންގުމަށް އެ ރިސޯޓޫން އިލްތިމާސްކުރެ އެވެ.
