އިންޑޮނީޝިއާގެ ބާލީގައި ކުޅެން ތާވަލް ކުރެވުނު ފީފާ 20 އަހަރުން ދަށުގެ ވޯލްޑް ކަޕްގެ ގުރުއަތުލުން ބާލީގައި ބާއްވަން ހަމަޖެހިފައި ވަނިކޮށް، މުބާރާތް އެ ގައުމުގައި ނުބާއްވާ ގޮތަށް ނިންމީ ބާލީގެ ގަވަރުނަރު ވަޔާން ކޮސްޓާ، އެ ގައުމުގައި ބާއްވާ މުބާރާތެއްގައި އިސްރާއީލް ބައިވެރިކުރަން ދެކޮޅު ހެދުމުންނެވެ. ގަވަރުނަރު ވަނީ ގުރުއަތުލުމުގެ ރަސްމިއްޔާތު ކެންސަލް ކޮށްފަ އެވެ.
އިންޑޮނޭޝިއާގައި މި މުބާރާތް ބޭއްވުމުގެ ފުރުސަތު ދިނީ 2019 ވަނަ އަހަރެވެ. އޭރު އިޒްރޭލް މި މުބާރާތަށް އަދި ކޮލިފައި އެއް ނުވެ އެވެ. މިއީ އިޒްރޭލް މުބާރާތަށް ކޮލިފައިވި ފުރަތަމަ ފަހަރެވެ. އެޓީމު ކޮލިފައިވީ މިދިޔަ އަހަރު ބޭއްވި 19 އަހަރުން ދަށުގެ ޔޫރޯ މުބާރާތުގެ ރަނަރަޕް ޓީމުގެ ގޮތުގަ އެވެ.
އާޖެންޓީނާގައި މެއި މަހުގެ 20 އިން ޖޫން 11 ގެ ނިޔަލަށް ކުރިއަށް ގެންދަން ހަމަޖެހިފައިވާ މުބާރާތުގެ ގުރުއަތުލުން ބާއްވަން ހަމަޖެހިފައި ވަނީ ފީފާގެ ހެޑްކުއާޓާސް ހުންނަ ސްވިޒަލެންޑްގެ ޒިއުރިޗުގައި ހުކުރު ދުވަހު އެވެ.
