އޮޑިޓް ރިޕޯޓްގައި ފާހަގަ ކޮށްފައިވާ ގޮތުން މި 17 މުވައްޒަފުންނަކީ ދައުލަތުގެ ނުވަ އިދާރާއަކުން ގާނޫނާއި ހިލާފަށް ނުވަތަ ފުރިހަމަ ކުރަންޖެހޭ ކަންކަން ފުރިހަމަ ނުކޮށް ކަނޑާލި މުވައްޒަފުންނެވެ.
މީގެތެރެއިން އެންމެ ގިނަ މުވައްޒަފުން ކަނޑަލީ ޓްރާންސްޕޯޓް މިނިސްޓްރީންނެވެ. އެ އިދާރާއިން ގާނޫނާއި ހިލާފަށް ނުވަ މުވައްޒަފަކު ކަނޑާލާފައިވާކަމަށާއި ވަޒީފާއާއި ބެހޭ ޓްރެބިއުނަލްގެ އަމުރަށް އެ މުވައްޒަފުންނަށް 1.4 މިލިއަން ރުފިޔާގެ ބަދަލެއް ދީފައިވާކަމަށް ސީއެސްސީގެ އޮޑިޓް ރިޕޯޓުން ދައްކައެވެ.
ދެން އެންމެ ގިނައިން ބަދަލު ދީފައިވަނީ ކައުންސިލްތަކުން ގާނޫނާއި ހިލާފަށް ކަނޑާލައި ނުވަތަ ފިޔަވަޅު އަޅާފައިވާ މުވައްޒަފުންނަށެވެ.
މީގެއިތުރުން މުވައްޒަފުން ވަޒީފާއިން ވަކިކުރަން ޖެހޭ ހާލަތްތަކުގައި، ގާނޫނީގޮތުން ފުރިހަމަ ކުރަންޖެހޭ ކަންކަން ފުރިހަމަ ކުރުމަށާއި، އެކަމަށް ބޭނުންވާ ގާނޫނީ ލަފާ ލިއުމުން ހޯދުމަށް އޮޑިޓް ރިޕޯޓްގައި ވަނީ އަންގާފައެވެ.
