ޕްރެޒިޑެންޓްސް ކަޕުގައި ސަސްއާ އީގަލްސް ކުޅޭ މެޗު އޮންނާނީ މިރޭ 10 ޖަހާއިރުއެވެ. މިއީ މި މުބާރާތުގައި އީގަލްސްގެ ފުރަތަމަ މެޗެވެ.
ސަސްވަނީ އެ ޓީމުގެ ފުރަތަމަ މެޗުގައި ބޮޑު ތަފާތަކުން ވެލެންސިޔާ ބަލިކޮށްފައެވެ. އެހެންކަމުން ސަސްއަށް މިރޭގެ މެޗަށް ނުކުންނައިރު ހުރިހާ ގޮތަކުންވެސް އެޑްވާންޓޭޖު ބޮޑެވެ. ސަސްގެ ކޯޗު، އިންމަ ބުނީ ދަގަނޑޭގެ ލީޑަޝިޕްގެ ބޭނުންހިފާނެ ކަމަށެވެ. އަދި ދަގަނޑޭ ހުރުމަކީ ކޯޗެއްގެ ގޮތުގައި ބޮޑު ހިތްހަމަ ޖެހުމެއް ކަމަށް އިންމަ ބުންޏެވެ.
ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު- ދަގަނޑޭ ކްލަބު ފުޓްބޯޅައާ އަހަރެއްހާ ދުވަހު ދުރުގައި ހުރުމަށް ފަހު އަލުން އެނބުރި އައިސް ޕްރެޒިޑެންޓްސް ކަޕުގައި މިދިޔަ ހަފްތާގައިވަނީ ވެލެންސިޔާ ކޮޅަށް ދެ ލަނޑު ޖަހާފައެވެ.
ހުކުރު ދުވަހުގެ ރޭ ދަގަނޑޭގެ ކެޕްޓަންކަމުގެ ދަށުގައި ސަސްއިން ވެލެންސިޔާ ބަލިކުރީ ފަސް ލަނޑު ސުން ލަނޑުގެ ބޮޑު ތަފާތަކުންނެވެ.
