"މޯލްޑިވްސް އޯޕަން 2023" ވެގެންދާނީ ރާއްޖޭގެ ތާރީޚުގައި މިހާތަނަށް ބާއްވާ ފުރަތަމަ ބައިނަލްއަގުވާމީ ބިލިއާޑް މުބާރާތެވެ. މި މުބާރާތް އޮންނާނީ މިއަދުން ފެށިގެން މި މަހުގެ 26 ވަނަ ދުވަހަށެވެ. މިއަދު ހަވީރު މުބާރާތް މާލޭގައި ރަސްމީކޮށް ފަށާއިރު، މުބާރާތް ފަށްޓަވައިދެއްވާނީ ފޮރިން މިނިސްޓަރު އަބްދުﷲ ޝާހިދުއެވެ.
ރާއްޖޭގައި ފުރަތަމަ ފަހަރަށް ބާއްވާ ބައިނަލްއަގުވާމީ ބިލިއާޑް މުބާރާތް "މޯލްޑިވްސް އޯޕަން" 10 ބޯލް ޗެމްޕިއަންޝިޕް މުބާރާތަކީ މި އަހަރުގެ "އޭޝިއަން ޓެން ބޯލް ޓުއާ" ސީރީޒްގެ ފުރަތަމަ މުބާރާތެވެ.
މި މުބާރާތުގައި 64 ކުޅުންތެރިން ވާދަކުރާ މި މުބާރާތުގައި ރާއްޖޭގެ 16 ބިލިއާޑް ކުޅުންތެރިން ވާދަ ކުރާނެ އެވެ. ރާއްޖޭގެ ކުޅުންތެރިންގެ ތެރެއިން އަށް ކުޅުންތެރިންނަކީ ގައުމީ ބިލިއާޑް ރޭންކިންގެ އެންމެ މަތިން ރޭންކް ކުރެވިފައިވާ އަށް ކުޅުންތެރިންނެވެ. އަދި ބާކީ އަށް ކުޅުންތެރިން ހޮވީ އެސޯސިއޭޝަނުން ކުރިއަށް ގެންދިޔަ ސިލެކްޝަން ޓްރިއަލްއެއްގެ ތެރެއިންނެވެ.
މުބާރާތުގައި ވާދަކުރާ ބޭރުގެ ކުޅުންތެރިންގެ ތެރޭގައި ދުނިޔޭގެ ޗެމްޕިއަންކަމާއި ވޯލްޑް ޕޫލް މާސްޓާސް ޗެމްޕިއަންކަން ހޯދާފައިވާ ޖަރުމަންގެ ޖޯޝުއާ ފިލާ، ދުނިޔޭގެ ޗެމްޕިއަންކަމާއި ވޯލްޑް ކަޕް އޮފް ޕޫލް ޗެމްޕިއަންކަން ވެސް ހޯދާފައިވާ އޮސްޓްރޭލިއާގެ އަލްބިން އޮއޫޝާން އަދި 9 ބޯލް އާއި 10 ބޯލް އަދި ވޯލްޑް ކަޕް އޮފް ޕޫލްގެ ޗެމްޕިއަންކަން ހޯދާފައިވާ ޓައިވާނުގެ ކޯ ޕިން ޔީ ހިމެނެ އެވެ.
މޯލްޑިވްސް އޯޕަންގެ ޗެމްޕިއަން ކުޅުންތެރިޔާއަށް ދޭ ޓްރޮފީގެ އިތުރުން 30000 ޑޮލަރުގެ ފައިސާގެ އިނާމާއި 10 ބޯލް އަދި އޭޕީއެފް ރޭންކިން ޕޮއިންޓް ލިބޭނެއެވެ. މިއީ ޖުމްލަ 130000 އެމެރިކާ ޑޮލަރުގެ އަގު ބޮޑު މުބާރާތެކެވެ.
