ރައީސް ސޯލިހް މިހެން ވިދާޅުވީ ސިއްހީ ދާއިރާގައި މަސައްކަތް ކުރާ މީހުންގެ މުސާރަ މާދަމާއިން ފެށިގެން ބޮޑު ކުރިކަން ރަސްމީކޮށް އިއުލާން ކުރެއްވުމަށް ފޮނުއްވި ވީޑިއޯ މެސެޖުގަ އެވެ.
ރައީސް ވިދާޅުވީ ރޭޑިއޭޝަން ތެރަޕިސްޓުންނާއި، މެޑިކަލް ފިޒިސިސްޓުންނާއި، ފާމަކޮލޮޖިސްޓުންނާއި، ޑައިލިސިސް ޓެކްނޮލޮޖިސްޓުން ފަދަ މަގާމުތަކުގައި މިވަގުތު ދިވެހިން ނެތް ކަމަށެވެ. މިއީ ފަންނީ ދާއިރާތަކެއް ކަމަށާއި މުސާރަ ބޮޑު ވަޒީފާތަކެއް ކަމަށް ރައީސް ވަނީ ވިދާޅުވެފަ އެވެ.
މީގެ އިތުރުން ސިއްހީ ދާއިރާއިން ތައުލީމް ހާސިލްކޮށްގެން މަސައްކަތުގެ ތަޖުރިބާ ހޯދުމަށް އިންޓާންޝިޕުގައި މަސައްކަތް ކުރާ މީހުންނަށް އެލެވަންސެއް ދިނުމަށް ނިންމާފައިވާކަމަށްވެސް ރައީސް ވަނީ ވިދާޅުވެފަ އެވެ.
ސަރުކާރުން އަންނަނީ ސިއްހީ ދާއިރާއަށް ވަރަށް ބޮޑު އަހައްމިއްޔަތު ކަމެއް ދެމުންނެވެ. އެގޮތުން މިމަހުގެ ތެރޭގައި ސަރުކާރުން ވަނީ ދިވެހި ޑޮކްޓަރުން ސްޕެޝަލައިޒްވުމުގެ ސްކޮލަޝިޕަށް ހުޅުވާލާފަ އެވެ.
