ރާއްޖޭގެ މެޑިކަލް މާފިޔާގެ ވާހަކައަކީ ޒަމާނުއްސުރެ ދައްކާ އެންމެންނަށް އެނގޭ ބޮޑު ސިއްރެކެވެ. އެކަމުގައި އިސްކޮށް ތިއްބެވީވެސް ނަންހިނގާ މަޝްހޫރު ބޭފުޅުންކަމަށް ބުނެވެއެވެ. ނަމަވެސް އެއްވެސް ސަރުކާރަކަށް އެމީހުންނާ ކުޅޭކަށް ނުކެރެއެވެ.
ސިއްހީ ދާއިރާގެ މުސާރަތައް މިއަދު ބޮޑުވެގެން ދިޔައިރު، އައިޖީއެމްއެޗްގެ ޑޮކްޓަރުން އެހެން ހޮސްޕިޓަލުތަކަށް ނުދިއުމަށް ބާރު އެޅުމަށް ކޮންމެވެސް ވަރެއްގެ މަސައްކަތެއް ސަރުކާރުން މިއޮތީ ކޮށްފައެވެ. ބޮޑުކުރި އެތައްހާސް އިތުރު މުސާރައާއިއެކު ސަރުކާރުން އެ ޑޮކްޓަރުންނަށް ދިނީ އިހްތިޔާރެކެވެ. އެއީ "އެކްސްކްލޫސިވް ސާވިސް ބެނިފިޓް" އެވެ.
ޑރ ފައިޒަލް ވިދާޅުވީ "އެކްސްކްލޫސިވް ސާވިސް ބެނިފިޓް" ދެވޭނީ އެކަމަށް އެއްބަސްވާ ޑޮކްޓަރުންނާއި ވަކިން އެގްރިމެންޓް ކުރެވި، އެ އެގްރިމެންޓްގެ ދަށުންކަމަށެވެ. ސުވާލަކީ އެކަމަށް އެ ޑޮކްޓަރުން އެއްބަސް ވާނެތޯއެވެ.؟ ބޮޑު މުސާރައެއް ކަނޑައަޅާ ބޮޑު އެލަވަންސާއެކު، އެހެން ހޮސްޕިޓަލެއްގައި މަސައްކަތް ކުރުން މަނާ ކުރަން މުތުލަގަށް މި ސަރުކާރަށްވެސް ނުކެރުނީ ކީއްވެ ހެއްޔެވެ؟
ބައެއް ޑޮކްޓަރުންނަށް ދައްކަން އައިޖީއެމްއެޗްގައި ބޮޑު ކިއުއެއް ދަމާލާފައި އޮންނަ އެއް ސަބަބަކީވެސް އެ ޑޮކްޓަރުން އިތުރު ހޮސްޕިޓަލުތަކުގައި މަސައްކަތް ކުރެއްވުމެވެ. ކްލިނިކް ތަކުގައި މަސައްކަތް ކުރެއްވުމެވެ. ހަފްތާއަކު ދެ ދުވަހު އައިޖީއެމްއެޗްގައި ޖުމްލަ 30 ބަލިމީހުން ބައްލަވާ ޑޮކްޓަރުން ކްލިނިކެއްގައި ނުވަތަ އެހެން ހޮސްޕިޓަލެއްގައި އެންމެ ދުވަހަކުން 50 ބަލިމީހުން ބައްލަވާކަން އެއީ އެންމެ ދަންނަ ކަމެކެވެ.
އެކަން އެނގެނީ އައިޖީއެމްއެޗުން އެޕޮއިންޓްމަންޓް ދެ މަސް ކުރިއަށް ނުލިބޭ ޑޮކްޓަރު އިންނަވާ އަނެއް ހޮސްޕިޓަލަށް ނުތަވަ ކްލިނިކަށް ދިއުމުން ހަމަ ވަގުތުން އެޕޮއިންޓްމަންޓް ލިބެއެވެ. ނަމްބަރު ލިބެއެވެ. ޕްރިންޓްކޮށްފައި ދޭ މެމޯކޮޅުގައި އިންނަނީ "55" ވަނަ ނަމްބަރެވެ. މާނައަކީ އެ ބަލިމީހާއަކީ އެ ކްލިނިކުން ނުނަތަ އެ ހޮސްޕިޓަލުން މިއަދު އެޑޮކްޓަރަށް ދައްކާ "55" ވަނަ މީހާއެވެ.
މައްސަލައަކީ ހަމައެކަނި އެޑޮކްޓަރުންނެއް ނޫނެވެ. އެއީ ސިޔާސަތު ކަނޑައަޅަން ތިއްބެވި ބޭފުޅުންގެ މައްސަލައެވެ. ހާއްސަކޮށް ޒަމާނުއްސުރެ އައިޖީއެމްއެޗްގެ ފެއިލިއާއެކެވެ.
ސަރުކާރުގެ އިސްމަގާމެއްގައި ހުންނެވި ބޭފުޅަކު ވިދާޅުވީ އައިޖީއެމްއެޗްގެ ހިދުމަތް ރަނގަޅުކުރަން ފުރަތަމަ ކުރަން ޖެހޭކަމަކީ އެތަނުގެ ޑޮކްޓަރުން ކްލިނިކް ތަކާއި އެހެން ހޮސްޕިޓަލުތަކުގައި މަސައްކަތްކުރުން މަނާކުރުމެވެ. އެކަމަކު އެކަން ކުރާނީ ކިހިނެއް ހެއްޔެވެ. އެކަން ކުރަން ތިއްވަބާ ބޭފުޅުން އަމިއްލަ ކުލިނިކް އެބަ ހިންގަވައެވެ.
ސިއްހީ ދާއިރާގެ މުސާރަތައް ބޮޑުކުރިއިރު ޑޮކްޓަރުން އެހެން ތަނެއްގައި މަސައްކަތް ކުރުން މަނާކުރުމުގެ ބަދަލުގައި އިހްތިޔާރެއް ދިނުމަކީ، އަނެއްކާވެސް ފަހަތަށް އެޅި ފިޔަވަޅެކެވެ.
ޑޮކްޓަރުންނަށް ސަރުކާރު ހޮޕިޓަލުންދޭ "އެކްސްކްލޫސިވް ސާވިސް ބެނިފިޓް"އަށް ވުރެ ބޮޑު އަދަދެއް ހަތަރު ތަނުގައި މަސައްކަތް ކޮށްގެން ލިބޭނަމަ އަދި ސަރުކާރު ހޮސްޕިޓަލުގެ ދޯދިޔާ ސިޔާސަތު އެގޮތަށް ކުރިއަށް އޮންނަ ނަމަ ޑޮކްޓަރުން ހަތަރު ތަނުން މުސާރަ ނެގުން ހުއްޓުވޭނެތޯއެވެ؟ ޑޮކްޓަރަށް ނުދެއްކި މަސްދުވަސް ވަންދެން ބަލިމީހަ ކިއުގައި ހުންނަން ޖެހޭ ޖެހުން ނިމުމަކަށް ގެނެވޭނެތޯއެވެ.؟ ރައްޔިތުންގެ ފައިސާއިން ބޮޑުކުރި މުސާރައިގެން މަންފާ ރައްޔިތަކަށް ފޯރާނެބާއެވެ.؟
