ސްޓެލްކޯއިން ބުނީ އޮމަދޫ ކައުންސިލުން ކުރިއަށް ގެންދިޔަ ރަށުތެރެ ސާފުކުރުމުގެ ޕްރޮގްރާމުގައި އެރަށު އިންޖީނުގޭގެ މުވައްޒަފުން ބައިވެރިވެފައިވާ ކަމުގައެވެ.
ސްޓެލްކޯއިން މީގެކުރިންވެސް ވަނީ އެ ކުންފުނީގެ އިޖުތިމާއީ ޒިންމާގެ ތެރެއިން ރަށްރަށުގައި ހިންގާ މިފަދަ ހަރަކާތްތަކުގައި ބައިވެރިވެފައެވެ. އެގޮތުން ކ. ހިންމަފުށީ ކައުންސިލުގެ ފަރާތުން އެ ރަށުގެ ދެ ގޮނޑުދޮށެއް ސާފުކުރުމަށް ހިންގި ހަރަކާތުގައި އެ ކުންފުނީގެ މުވައްޒަފުން ބައިވެރިވެ، އެހީތެރިކަން ފޯރުކޮށްދީފައިވާ ކަމަށް ސްޓެލްކޯއިން ބުނެއެވެ.
ސްޓެލްކޯއިން ބުނެފައިވާ ގޮތުގައި ދިއްދޫ އިންޖީނުގޭގެ މުވައްޒަފުންގެ އިސްނެގުމާ އެކު، ރަށުގެ ގިނަ ސަރަހައްދުތަކެއްގައި ދީނީ ނަސޭހަތާއި އިޖުތިމާއީ ގޮތުން ރައްޔިތުން ހޭލުންތެރިކުރުވުމަށްޓަކައި ގިނަ ޝިއާރުތަކެއް ހިމެނޭ ކުދި ބިލްބޯޑުތަކެއް ހަރުކުރެވިފައިވާ ކަމުގައެވެ.
ރަށު ފެންވަރުގައި ހިންގޭ މި ފަދަ އިޖުތިމާއީ ހަރަކާތްތަކުގައި ބައިވެރިވުމަކީ އެ ކުންފުންޏަށް އަބަދުވެސް ލިބޭ އުފަލެއް ކަމުގައި ސްޓެލްކޯއިން ބުނެއެވެ.
