ނަޕޯލީން ޗެމްޕިއަންކަން ކަށަވަރުކުރީ އިޓާލިއަން ލީގުގައި ރޭ އުދިނޭޒީއާ 1-1 އިން އެއްވަރުކޮށްގެނެވެ. އެއީ އަދި ބާކީ ފަސް މެޗު އޮއްވައެވެ.
ނަޕޯލީން ރޭ ހޯދި ޕޮއިންޓާއެކު އެ ޓީމަށް ވަނީ 33 މެޗުން 80 ޕޮއިންޓް ލިބިފަ އެވެ. ދެ ވަނައިގައި އޮތް ލާޒިއޯ އަށް 33 މެޗުން ވަނީ 64 ޕޮއިންޓް ލިބިފަ އެވެ. ބާކީ ހުރިހާ މެޗަކުން ނަޕޯލީ ބަލިވިޔަސް، ދެން އެހެން ޓީމަކަށް ނަޕޯލީ އަށް ވުރެ ކުރި ލިބޭނެގޮތެއް ނެތެވެ.
މީގެ ކުރިން ނަޕޯލީން ދެ ފަހަރު އިޓާލިއަން ލީގު ހޯދިއިރު ދެ ފަހަރުވެސް ޗެމްޕިއަންކަން ހޯދީ ދުނިޔޭގައި އުފެފުނު އެންމެ މޮޅު އެއް ކުޅުންތެރިޔާ ކަމަށްވާ އާޖެންޓީނާގެ މަރަޑޯނާގެ މޮޅު ކުޅުމާއެކުއެވެ. އެންމެ ފުރަތަމަ ހޯދީ 1987 ވަނަ އަހަރު އެވެ. އޭގެ ފަހުން، 1990 ވަނަ އަހަރު އެވެ.
ރޭގެ މެޗަށް ފަހު ނަޕޯލީ ނިސްބަތްވާ ސަރަހައްދު، ނޭޕްލްސްގެ މަގުތަކަށް މީހުން އެއްވެ، ހަވާ އަރުވާ މުޅި ސަރަހައްދުގައި އުފާފާޅުކުރިއެވެ. ނޭޕްސްއަށްވަނީ ބޮޑު އީދެއް އައިސްފައެވެ.
