މިދިޔަ އަހަރުގެ ލީގުގެ ރޭންކިންއަށް ބަލައި ތައްޔާރުކޮށްފައިވާ ލީގުގެ ޝެޑިއުލްގައިވާ ގޮތުން ލީގު ފަށާނީ އަންނަ ހޯމަ ދުވަހުގެ ހަވީރުއެވެ. ހަވީރު ވެލެންސިޔާއާ ޓީސީ ކުޅުމަށް ފަހު، އެރޭ ކުޅޭނީ މިދިޔަ އަހަރުގެ ލީގުގެ ދެވަނަ ހޯދި އީގަލްސްއާއި މުޅިން އަލަށް ޕްރޮމޯޓްވި ދެވަނަ ޑިވިޝަނުގެ ޗެމްޕިއަން ބުރު ސްޕޯޓްސްއެވެ.

އެންމެ ފަހުގެ ޗެމްޕިއަން މާޒިޔާގެ މެޗެއް އޮތީ އަންގާރަ ދުވަހު ހަވީރުއެވެ. މާޒިޔާ އަންގާރަ ދުވަހު ހަވީރު ކުޅޭނީ ޔޫވީއާއެވެ. އަދި އެރޭ ކުޅޭނީ ގްރީން ސްޓްރީސްއާއި ސުޕަ ޔުނައިޓެޑް ސްޕޯޓްސް (ސަސް)އެވެ. ލީގުގައި ކުޅޭނީ ޖުމްލަ އަށް ޓީމެވެ.

ލީގު ރާވާފައިވާ ގޮތުން ފުރަތަމަ ބުރުގައި ކޮންމެ ޓީމެއް ތިން މެޗު ކުޅުމަށްފަހު، މެއި 19 ވަނަ ދުވަހު ލީގު މެދުކަނޑާލާނެއެވެ. އެއީ އަންނަ މަހު އޮންނަ ސާފް ޗެމްޕިއަންޝިޕަށެވެ. ސާފަށް މެދު ކަނޑާލުމަށް ފަހު ދެން އަލުން ފަށާނީ ޖުލައި 14 ވަނަ ދުވަހުއެވެ.