ސްޓެލްކޯއިން ބުނީ "އަވިކަތަ" މަޝްރޫއުގެ ދަށުން އެކުންފުންޏަށް ގޭގެ ފުރާޅު ކުއްޔަށް ދީގެން އާމްދަނީ ހޯދުމުގެ ފުރުސަތު މިހާރު ހުޅުމާލާފައިވާ ކަމަށެވެ.
އެގޮތުން ސޯލާ ޕެނެލް ހަރުކޮށްގެން ގޭގެ ވެރިފަރާތަށް ކުލި ލިބޭއިރު ހަރުކުރެވޭ ކޮންމެ އެއް ކިލޯ ވޯޓްގެ ސޯލާ ޕެނެލްއަށް މަހަކު 180.60 ރުފިޔާގެ މަގުން ކުލި ލިބޭނެކަމަށް ސްޓެލްކޯއިން ބުނެއެވެ.
އަދި ސޯލާ ޕެެނެލް ހަރުކުރުމާއި އެކަމަށް ހިނގާ ހުރިހާ ހަރަދެއްވެސް ކުރާނީ ސްޓެލްކޯއިން ކަމަށް އެކުންފުނިން ވަނީ ބުނެފައެވެ.
ސްޓެލްކޯއިން ބުނީ އަވިކަތަ ސޯލާ ޕެނަލް ހަރުކުރާނީ މަދުވެގެން 1000 އަކަފޫޓުގެ ހުސް ޖާގަ އޮންނަ ފްރާޅުގައި ކަމަށާއި އެކަމަށް ކުއްޔަށް ނަގާނީ މަދުވެގެން 150 ކިލޯގެ ބަރުދަން އުފުލޭ ވަރުގެ ފުރާޅު ކަމަށެވެ.
އަދި ކުއްޔަށް ނަގަ ފުރާޅަކީ ފަސޭހައިން އިރުގެ އަވިލިބޭނެ ތަނަކަށް ވުމުގެ އިތުރުން ޕެނަލް އަދި އިންސްޓަލޭޝަން ވަސީލަތްތައް ހަރުކުރެވޭނެ ޖާގަ އެތަނެއްގައި ހުންނަން ޖެހޭނެކަމަށްވެސް އެކުންފުނިން ބުނެއެވެ.
